Inicio » Peques en casa

Peques en casa

Amiestos misteriosos: Oobleck

07/07/2020

Vamos facer Oobleck, vamos esperimentar con él y vamos emplegar pa fabricar una bolina antiestrés bien molona

¡¡Encántanos saltar!! Saltar nel suelu, saltar nuna colchoneta… Y, sobromanera, ¡¡saltar nos charcos!! Pero… ¿entrugastite dalguna vegada por qué nun se pue saltar cuando yá tas nel aire saltando? ¿O inclusive enriba del mar?

¿Por qué cuando echamos agua nun vasu ocupamos tol espaciu, pero si echamos daqué como madera namás pues echar trocitos? La madera nun se deforma, ente que l'agua sí, toma la forma del vasu.

La respuesta primera ye fácil: l'aire ye un gas, l'agua ye un llíquidu y la madera ye sólida. Pero ¿les entrugues acábense ende? ¡Noon! La nuesa mente científica entrúgase entós: ¿por qué l'agua ye un llíquidu y la madera un sólidu?, ¿pue daqué llíquidu convertise nun sólidu o nun gas? Y… ¿qué camentaríes si te dixera qu'esisten llíquidos que dacuando se porten como sólidos? Estrañu ¿verdá? ¿Un llíquidu sólidu? ¿Cómo pue ser eso posible?

Na propuesta de güei vamos pásalo bien xugando con unos fluyíos bien especiales llamaos non newtonianos, que se porten d'una forma bien rara y pringaremosnos un montón les manos tocándolos. Vamos poder esfrutar sintiendo estrañes testures y reparando formes y fenómenos que paecen imposibles. Y ye que, la ciencia, danos munches idees pa pasánoslo bien.

¡Entamemos!

Materiales

  • 2 taces de farina fino de maíz (Maizena)
  • 1 taza d'agua (aprosimao)
  • Colorante alimentario o acuarela llíquida (optativu)
  • Cazu pa entemecer
  • Globu
  • Embudu
  • Botella de plásticu

Observaciones

Quiciabes precisemos un pocoñín d'ayuda pa facer la pelota antiestrés, sobromanera a la hora de suxetar el globu, meter nél la boca de la botella y pa saca-y l'aire al final.

Ye conveniente tener en cuenta que la bolina antiestrés pue pinchase al xugar con ella, asina que quiciabes sía bona idea facelo nuna bandexa, na bañera o cuando salemos a la cai.

Preparativos

Quiciabes enllordiámonos un pizcu, polo qu'encamentamos emplegar ropa que nun nos importe emporcar. Tamién vamos intentar facer l'esperimentu en llugar cómodu nel que podamos llimpiar les posibles chiscadures, como la mesa de la cocina o similar.

¡Manes a la ciencia!

Güei vamos convertinos en químicos y químiques pa fabricar Oobleck, que ye un llíquidu muuuuuui especial. L’ Oobleck ye un fluyíu non newtoniano, ¿habíes oido dalguna vegada esa pallabra?  Dempués vamos poder xugar y esperimentar con él y vamos afayar de qué se trata.

Fabricamos Oobleck

  • Nun recipiente grande, echamos dos taces de farina blanco de Maiz (Maizena).
  • Sobro ella, entamamos a añadir agua mientres revolvemos l'amiestu con una cuchar o hasta coles manos. Vamos tener qu'echar aprosimao una taza d'agua, pero diremosla echando pocoñín a pocoñín, hasta que veamos que la farina ta disuelta y tenemos un amiestu homoxéneo.

¡Yá tenemos el nuesu fluyíu non newtoniano! Agora toca esperimentar con él. Prueba a coyer con fuerza o cutir la masa ¿ye dura? ¿ye como un sólidu o un llíquidu?

Agora prueba a meter la mano pocu a pocu ¿sigui siendo duru? ¿Qué sientes cuando lo toques? Tien una testura bien especial, distinta…

Podemos intentar facer bolines cola mano, como si fuera plastilina, dar un golpe col puñu al amiestu...déxate llevar poles sensaciones y ¡recuerda! Lo más importante ye qu'esfrutes esquizando y esperimentando.

Si queremos que tenga un pocu de color, podemos echa-y unes gotes de colorante alimentario o acuarela llíquida y volver remover.

Pelota antiestrés

Agora que yá lo tenemos preparáu, podemos facer una pelota anti-estrés col fluyíu. Si la apertamos con fuerza, va volvese dura, pero si la movemos selemente va ser bien blanduxa. Vamos, que tenemos que coyer relaxadamente pa que nun se porte como un sólidu ¿Cómo lo fadremos?

  • Primero vamos echar el Oobleck (la cantidá que queremos qu'enllene'l nuesu globu) dientro d'una botella de plásticu. Podemos usar un embudu por que sía más fácil.
  • Dempués, enchemos un globu y, intentando que nun s'escape munchu aire, engabitamos a la boca de la botella.
  • Xiremos la botella y dexamos qu'el Oobleck vaiga enllenando'l globu adulces.
  • Cuando yá lo derramáramos, dexamos escapar l'aire del globu y cerramoslo faciendo un ñuedu.

Yá vamos tener llista la nuesa pelotita anti-estrés.  ¿Verdá que ye prestada?

Para siguir esperimentando

Esisten otros esperimentos con fluyíos que tamién nos pueden resultar bien risonderos. Si tienes un altavoz (subwoofer) vieyu en casa, puedes forralo con papel film pa protexelo y echar el fluyíu sobro l'altavoz. Si lo prendemos y ponemos música, sobremanera dalgún cantar que tenga muncha percusión o con una frecuencia cimera a los 30 Hz, vas poder reparar les estrañes formes que va faciendo'l líquidu. Si nun puedes facelo, pero te prestaría poder ver esti esperimentu, pincha nesti vídeu y a partir del minutu 2:20 vas poder visualizar lo qu'asocede a cámara lenta.

Esisten munchos otros xuegos y esperimentos que podemos facer con esti tipu de fluyíos ¿asocédete dalgunu?

Para saber más

La mayoría de los llíquidos, como l'agua o l'alcohol son fluyíos newtonianos y siempres son igual de viscosos. Col esperimentu de güei pudimos comprobar que dalgunos otros nun lo son. Hai fluyíos que, cuando-yos aplicamos tensión o camudamos la temperatura, van camudar de viscosidá. Estos son los fluyíos non newtonianos, aquellos que nun tienen una viscosidá constante.

L'amiestu de maizena y agua (oobleck) que preparemos y cola que tuvimos esperimentando ta formáu por un montón de granitos bien pequenos que se mueven y flúin cuando lu tocamos y movemos selemente. Ye un llíquidu bien espesu y viscosu.

Pero, ¿qué pasa cuando lu golpeamos o apertamos con rapidez? Los granos xúntense tantu tantu ente sí, tan rápido, que por un momentu queden bloquiaos, nun-yos da tiempu a movese, a fluyir: vuélvese tan tan viscosuque se porta como si fuera un sólidu. 

Esisten munchos otros fluyíos non newtonianos sorprendentes, como por casu los sables moventibles. Estos pórtense d'una forma asemeyada al oobleck, polo que xugando con él vamos poder saber un pocoñín sobro como escapar d'estos tarrecíos sables. Si quies, écha-y una güeyada a esti vídeu y vas poder conocer dellos trucos.

Y ye que, estos fluyíos, ¡son bien risonderos! Si non di-ylo a estes persones que algamaron facer una fiesta ¡enriba del llíquidu d'una piscina! ¿van fundise cuando pasen rápido? ¿y si queden quietos?

¿Qué faen los científicos y científiques?

La ciencia qu'estudia esti tipu de fluyíos ye la mecánica de fluyíos, una caña de la física, anque tamién pue estudiase dende les matemátiques o la química.

Sara Zahedi ye una matemática iranina ganadora del premiu de la Sociedá Europea de Matemátiques pol desenvolvimientu d'innovadores métodos matemáticos na mecánica de fluyíos. Amás, consiguió facer un programa predictivu d'ordenador (modelu) sobro líquidos que nun se pueden entemecer (non miscibles), lo qu'ayuda a conocer les consecuencies medioambientales de los arramaos de petróleu nel mar. Sara vive como abelugada en Suecia dende los diez años, ú llevó a cabu tol so llabor científicu y ye que, según ella, les matemátiques ayudaron a resolver problemes reales del mundu nel que vivimos.

¿Queréis cuntanos daqué?

Encantaríanos poder acompañar les vueses esperiencies, anque sía dende la distancia. Por eso, vamos establecer una vía de diálogu de forma virtual. ¿Cómo lo fadremos?

  • Podéis unvianos les vueses duldes, suxerencies, esperiencies, etc. colos y les peques al corréu electrónicu, poniendo nel asuntu del email “Unipeques en casa”.
  • Podéis siguinos nes redes sociales de la Universidá d'Uviéu, onde vamos dir espublizando les novedaes d'esta páxina. Amás, si compartís les vueses esperiencies en redes sociales, podéis mentanos (universidá_pa_peques n’Instagram) ya emplegar el hashtag universidápapeques.
  • Tamién podéis siguinos al traviés del nuesu canal de telegram y en Instagram, pa tar al día de les nueves publicaciones.

 

Artículo traducido por Elena González Menéndez.

 

La Universidad para peques/ Universidá pa guah.es / Children's University es un proyecto de la Universidad de Oviedo, que cuenta con la colaboración de la Fundación Española para la Ciencia y la Tecnología - Ministerio de Ciencia, Innovación y Universidades, Caja Rural de Asturias, Banco Santander, Grupo Hunosa, Ayuntamiento de Siero, APADAC, Pridental, Cluster TIC Asturias, DXC Technology, Lacera e ITVasa.

 

 

Enlaces rápidos