Inicio » Peques en casa

Peques en casa

Ciencia de colores

02/06/2020

Una xera pa que los y les más peques xueguen colos colores axuntándolos y creando otros nuevos.

Los colores arrodienos, podemos topalos nos oxetos, nes partes del nuesu cuerpo, si nos asomamos a la ventana na cai, nel cielu. Paecen xugar, mecese y formar otros nuevos.

Güei prestaríanos que foramaras parte d’esi xuegu con colores, descubriendo, esperimentando y esplorando con colores que crearas nel laboratoriu de la to casa.

Crearemos los nuesos propios colores partiendo de los tres colores primarios, maxenta, cian y mariellu, que son aquellos que nun podemos algamar axuntando nengún otru. Con esta propuesta veremos cuántos colores podemos crear a partir d’estos colores tan especiales.

Materiales

  • Acuareles o colorante alimenticiu de los tres colores primarios: maxenta, cian y mariellu
  • Frasquinos o vasos pa disolver les acuareles
  • Pinceles
  • Cubitera o tapones reciclaos
  • Cucharilles, tapones o esponxes pa facer tresvases
  • Algodones, bastoncillos pa los oyíos, papel, cartulina o cualesquier oxetu que tengáis

Preparativos

  • Preparamos tres frasquinos o vasos con agua (unos 50 mL ye bastantina, siempres podéis facer más si lo necesitáis). Pa preparalo, echamos agua nel frascu (con unos 50 mL ye bastantina) y, con ayuda d’un pincel, vamos eslliendo adulces acuarela nél, hasta que’l color sía suficientemente intensu.
  • Si utilizamos colorante alimentariu o acuarela llíquida, simplemente vamos echando gotines de cada color hasta algamar la intensidá deseada.
  • Pondremos sobro la mesa la cubitera vacía onde faeremos les nueses mestures y lo que nos ayudará nel tresvase.
  • Buscamos una superficie na que podamos esperimentar ensin mieu a manchar.

Observaciones

Si nun tenéis acuareles o colorante de los colores primarios, podéis a cencielles utilizar los colores azul, coloráu y mariellu.

Pa facer el tresvase de los colores y amestalos podemos emplegar cuchares o los mesmos tapones. Inclusive podríemos probar con otres formes de treslladar llíquidos como esponxes.

Si usamos esponxes, ye meyor emplegar una pa tresvasar cada color, si nun queremos amestar los colores antes de tiempu. Pero podría ser otru esperimentu…

Amás de crear los nuesos propios colores, observaremos la capacidá d’absorción tan diferente que tienen distintos materiales y superficies.

Descubrimos

Pa ñiciar la nuesa aventura colos colores proponémosvos esti cuentu de Leo Lionni que trabayo’l profesoráu y alumnáu del Ceip d’Alpartir en Zaragoza. La hestoria de pequeñu azul y pequeñu mariellu.

¡Amás danos una idea pa crear la nuesa pequeña representación de pequeñu azul y pequeñu mariellu!

¡Manes a la ciencia!

Tendremos na mesa los tres botes cola disolución de los tres colores primarios, la cubitera y lo qu’eleximos pal tresvase.

Enllenamos un furacu de cada color na cubitera y… ¡yá podemos entamar a esperimentar!

¿Sedremos capaces, emplegando namái los tres colores primarios, de crear tolos colores del arcoíris? 

Vamos coyendo un pucuñín de cada color y entemeciéndolos nos furacos vacíos, tantes vegaes como queramos, dexándonos llevar pola emoción de la sorpresa. ¿Reconocemos los colores que tamos creando? ¿Paecense? ¿Vímoslos nel nuesu entornu?

Depués de disfrutar d’esti momentu de creatividá y esperimentación podemos siguir esplorando y resolver pequeñes y grandes duldes con respectu a dalgunos oxetos. ¿Cómo se verán los nuesos colores nel algodón, nun trozu de papel? ¿Qué socede si vertemos más o menos llíquidu nuna tela? ¿Cuánto llíquidu podrá absorber un bastoncillu d’algodón?

Ye’l momentu de dar respuesta a toles nueses hipótesis.

Pa siguir esperimentando

Podríemos aprovechar la propuesta pa siguir investigando, ¿qué pasaría colos nuesos colores si los metiéramos nel conxelador? Y si probaramos a investigar ¿cómo se comportarán los nuesos colores con los mesmos oxetos de la bandexa pero depués de tar nel conxelador? ¿Cómo volver a ser colores llíquidos?

¿Queréis contanos dalgo?

Encantaríanos poder acompañar les vueses esperiencies, anque sía dende la distancia. Por eso, estableceremos una vía de diálogu de forma virtual ¿Cómo lo fadremos?

Podéis unvianos les vueses duldes, suxerencies, esperiencies, etc. colos y les peques al corréu electrónicu, escribiendo nel asuntu del email “Unipeques en casa”.

Podéis siguinos nes redes sociales de la Universidá d’Uviéu, onde diremos publicando les novedaes d’esta páxina. Amás, si compartís les vueses esperiencies nes redes sociales, podéis mencionanos y utilizar l´hashtag #unipequeencasa y #universidadparapeques.

Al traviés del nuesu canal de telegram tamién podéis siguinos y tar al día de les nueves publicaciones.

Artículo traducido por María Iglesias Orviz

La Universidad para peques/ Universidá pa guah.es / Children's University es un proyecto de la Universidad de Oviedo, que cuenta con la colaboración de la Fundación Española para la Ciencia y la Tecnología - Ministerio de Ciencia, Innovación y Universidades, Caja Rural de Asturias, Banco Santander, Grupo Hunosa, Ayuntamiento de Siero, APADAC, Pridental, Cluster TIC Asturias, DXC Technology, Lacera e ITVasa.

 

 

 

Enlaces rápidos