Inicio » Peques en casa

Peques en casa

Cromatografía: colores a la carrera

26/05/2020

Cola ayuda de la química, consiguiremos dixebrar la tinta de los nuesos rotuladores nos sos colores primarios.

Casi toles persones sabemos que, si axuntamos los colores azul y mariellu, algamaremos el verde. Pero ¿qué ocurre col procesu inverso? ¿Podemos dixebrar el color verde en los sos colores primarios azul y mariellu?

Cola propuesta que vos facemos güei, podremos convertinos en ¡químicos y químiques! pa descubrir la respuesta.

Materiales

  • Filtros de café
  • Vasín con agua
  • Rotuladores
  • Tixeres
  • Papel de cocina

Preparativos

 

Tendremos que facer un furacu nel centru de cada papel, que tenga aproximadamente’l diámetru d’un deu. Una forma de facelo ye doblando’l papel de filtru pela metá dos veces y cortando la pica un poquitín. Los y les peques más peques puen necesitar un poquitín d’ayuda nesti pasu.

¡Manes a la obra!

Yá tenemos too listo pa entamar el nuesu esperimentu. ¿Sedremos capaces de dixebrar la tinta del rotu verde nos sos colores primarios azul y mariellu? ¡Vamos intentalo!

Lo primero que tenemos que facer ye pintar un círculu col rotulador escoyíu nel papel de filtru. Pa la primera prueba, aconseyamos facer un círculu alredor del furacu central, que quede bastante cerquina, anque sin que sía xusto al borde. Tamién podemos facer el círculu de colores estremaos, asina podremos ver bien qué socede nesti esperimentu y pensar cómo queremos facer los siguientes.

 

Depués coyemos un trocín de papel de cocina y enroscamoslu de mou que paezca un churrín.

 

Introducimos el nuesu rollitu de papel de cocina pel furacu del filtru, de mou que nos quede un poco de papel per arriba y un poco de papel per baxo.

Apoyamos el nuesu filtru nel vasu con agua de tal mou qu’un estremu del papel de cocina quede dientro del agua y el dibuxu mirando hacia’l techu.

 

Abrimos muncho los güeyos y esperamos ¿Qué-yos pasa a los nuesos colores?

 

Podemos ver como los pigmentos de los nuesos dibuxos van dixebrandose poco a poco ¡Como si fuere una carrera de colores!

 

¿Cuántos colores salen de caún? ¿Cuál foi’l que llegó más lloñe?

 

Pa siguir esperimentando

Agora que yá conoces esta téunica y cómo utilizala, de xuru que per casa tenemos otros tipos de papel absorbente como pue ser el papel de cocina o papel hixénico ¿qué pasará nestos papeles? ¿pasará lo mesmo?

Y… ¿nuna fueya de papel o cartulina?

Cuando yá tengamos listes toles nueses creaciones, podemos utilizales pa pintar enriba cuando tean ensuches, facer un cuadru con elles… tolo que se nos ocurra.

 

Podemos crear hasta un ramu flores, recortando les nueses creaciones na forma que más nos preste y uniéndoles a un palu.

 

¿Queréis contanos dalgo?

Encantaríanos poder acompañar les vueses esperiencies, anque sía dende la distancia. Por eso, estableceremos una vía de diálogu de forma virtual ¿Cómo lo fadremos?

Podéis unvianos les vueses duldes, suxerencies, esperiencies, etc. colos y les peques al corréu electrónicu, escribiendo nel asuntu del email “Unipeques en casa”.

Podéis siguinos nes redes sociales de la Universidá d’Uviéu, onde diremos publicando les novedaes d’esta páxina. Amás, si compartís les vueses esperiencies nes redes sociales, podéis mencionanos y utilizar l´hashtag #unipequeencasa y #universidadparapeques.

Al traviés del nuesu canal de telegram tamién podéis siguinos y tar al día de les nueves publicaciones.

 Artículo traducido por María Iglesias Orviz

La Universidad para peques/ Universidá pa guah.es / Children's University es un proyecto de la Universidad de Oviedo, que cuenta con la colaboración de la Fundación Española para la Ciencia y la Tecnología - Ministerio de Ciencia, Innovación y Universidades, Caja Rural de Asturias, Banco Santander, Grupo Hunosa, Ayuntamiento de Siero, APADAC, Pridental, Cluster TIC Asturias, DXC Technology, Lacera e ITVasa.

 

 

Enlaces rápidos