Inicio » Peques en casa

Peques en casa

Curves en movimientu

05/06/2020

Fadremos un espirógrafu, una peonza y un spinner pa crear curves lloques en movimientu.

Mirando, mirando, acabeme atopando… ¡¡con llínies y llínies per toes partes!! Y ye que, allá onde alcemos la vista, atoparemos llínies. Al nuesu alredor podemos ver milenta llínies, nel nuesu cuerpu, nos xuguetes, nel paisaxe ¡Too ta lleno de llínies!

Eses sucesiones de puntinos que, a veces, paecen nun tener fin. Puen ser reutes, como’l borde de la nuesa cama o curves como’l sol que se dibuxa nel horizonte.

Güei adientrarémonos nel maravillosu mundu de les curves. Emplegaremos un espirógrafu, una ferramienta cola que fadremos unes llínies curves perespeciales y guapes y, amás, pondrémosles en movimientu, creando una peonza y un spinner, xuguetes que pondrán a les curves molones a rodar.

¿Preparaos pa divertinos cola ciencia? Pues, vamos abrochar el cinturón… ¡que vienen curves!

Materiales

Espirógrafu:

  • Bolígrafos, rotuladores y/o llápices
  • Tapones medianos, de más de 4cm de diámetru
  • Cilindru interior de cinta americana, de cinta de carroceru… o cualesquier cilindru más o menos grande abiertu per ambes bases
  • Tixeres
  • Pegamín
  • Cartón rugoso. Podemos alcontralu, por exemplu, nel envoltoriu dalgunes galletes
  • Destornellador o cualesquier oxetu que nos sirva pa facer furacos nos tapones

Peonza:

  • Cartón
  • Tixeres
  • Una moneda o torniellu y tuerques

Spinner

 

  • Cartón
  • Tixeres
  • Cuerda o trozu de llana d’unos 50cm o más

Descubrimos

Quiciabes los nuesos güeyos nun tean mui avezaos a ver curves. A ver, vamos intentar entrecerralos un pucuñín… ¿vemos dalguna más? ¿Nada? ¡Pues ta enlleno! ¿Ónde les podemos atopar? Na naturaleza, ente los oxetos inertes, ensin vida, podemos alcontrar dalgunes curves inertes:

¿Y ente los seres vivos? ¿Hai llínies curves? ¿Cuántes curves vives podemos ver nestes imáxenes?

Pa finar, ente los oxetos humanos tamién podemos atopar dalguna curva culta:

¿Visti? ¡Hai curves per toes partes! Y si agora mesmo alzamos la vista ¿Cuántes llínies curves pues atopar?

¡Manes a la ciencia!

Lo primero que vamos facer ye ¡arte con curves!

Pa ello, emplegaremos un espirógrafu. ¿Vistis uno dalguna vegada? Ye una ferramienta de dibuxo que ta formada por engranaxes de plásticu, que puen ser circulares o de dixebraes formes, y tienen furaquinos en varies posiciones. Per otra parte, hai un aniellu grande que fai de “plantiya”. Tien muesques al so alredor, qu’encaxen nes muesques de los engranaxes. Pa emplegalo, tenemos qu’introducir la punta d’un rotulador o bolígrafu nuno de los furaquinos del engranaxe, y facelo rodar pel interior del aniellu dentáu.

Si nun tenéis un espirógrafu en cada, equí contamosvos cómo podemos crear uno con materiales reciclables:

  • Pa facer la pieza interior, tenemos que facer un furacu, o varios, nel tapón que nos servirá como engranaxe internu. Podemos facelo emplegando un sacacorchos, con un destornellador o inclusive clavando la punta d’un clavu o un torniellu y xirando un poco. Ye importante que los furacos nun tean mui lloñe del centru, pero nun esactamente nél, y qu’entre y se mueva la punta del bolígrafu con facilidá.
  • Agora crearemos l’aniellu dentáu. Necesitamos un oxetu con forma de cilindru grande y que tea abiertu per ambes bases pa usar como arcu esterior del espirógrafu. Podemos emplegar el furacu d’un rollu de cinta de carroceru, cinta americana, etc. Si nun tenemos nada con forma de cilindru, podemos dibuxar con un compás una circunferencia nun cartón que sía bastantina gordo, pa depués recortar l’interior.
  • Recortamos tires de cartón rugoso y les pegamos na cara interior del cilindru y na cara esterior del tapón.

¡Yá tenemos el nuesu espirógrafu llistu!

Agora solo tenemos que colocar l’aniellu dentáu sobro una fueya de papel, y nel so interior, el tapón. Inxertamos la punta del bolígrafu nuno de los furacos que ficimos nel tapón y lo facemos rodar pel interior del cilindru, intentando que nun se dixebre de les parés.

Si nun te sal a la primera, nun te preocupes, necesitamos coye-y el puntu a dibuxar con esta ferramienta. Lo importante ye que’l tapón xire pegáu a la paré del cilindru.

Podemos emplegar una masilla tipu “blue tack” pa suxetar el cilindru al papel y que nun se mueva mientres rodamos el tapón.

¡¡Yá tenemos les nueses curves molones!! ¿verdá que queden perguapes? Podremos emplegales pa lo que más nos preste ¿La to llibreta necesita una poco de decoración? ¿Necesites un nuevu marcapáxines pa los tos llibros? Y si los ficieramos más resistentes pegándo-yos plásticu pa forrar los llibros, ¿pa qué los podríemos emplegar? ¿Posavasos quiciabes? Si dexamos volar la nuesa imaxinación podremos alcontrar milenta posibles usos que da-yos.

Otra idea xenial ye da-yos movimientu. Pero… ¿¿cómo?? Equí facemoste dos propuestes.

Peonza:

  • Dibuxamos una circunferencia nun cartón y recortamosla. Podemos usar l’aniellu del espirógrafu como plantiya.
  • Colocamos el círculu de cartón sobro les nueses curves, dibuxamos el so contornu y recortamos.
  • Pegaremos el círculu de papel sobro’l de cartón.
  • Coles tixeres, fadremos un orificiu nel centru, del tamañu d’una moneda.
  • Introduciremos una moneda nel orificiu, fasta la metá y… ¡a xirar!

Tamién podemos emplegar un torniellu o un espárragu y suxetar el cartón con tuerques.

Spinner:

  • Preparamos un círculu de cartón, igual que ficimos pa la peonza.
  • Agora recortamos y pegamos dos papeles dibuxaos, unu en cada llau del círculu de cartón.
  • Con unes tixeres o cualesquier otru oxetu punzante fadremos dos pequeños orificios nel centru del spinner, uno pegáu al otru.
  • Introduciremos cada estremo de cuerda per cada orificiu y amarramoslos faciendo un pequeñu nudu.

¡¡Agora tenemos que facela bailar!! Pa ello, coyemos con cada mano uno de los estremos del spinner y lo facemos xirar faciendo que la cuerda se vaya enrollando sobro sí mesma. Cuando tea mui enrollada, dixebramos les manes, tensando la cuerda y… ¡¡¡a xirar!!!

Pa siguir esperimentando

Podemos facer tolos diseños que nos apeteza pa los spinners, emplegando los materiales que prefieras pa ello, Si dibuxamos puntos siguíos, ¿verémoslos como llínies curves al mover el spinner? ¿Y si probamos a dibuxar una espiral como las que facíamos equí? ¡Soprenderavos el resultáu! Dibuxa o pinta lo que más te preste, descubrirás distintos efectos que puen quedanos perguapos.

Pa saber más

Les llínies curves, como vimos, alcuéntrense per toes partes, sin embargu ¿sabías que’l nuesu cerebru engañanos y tiende a ver llínies reutes onde nun les hai? ¿Nun me crees? Pues mira esta imaxen:

 

Takahashi, K. (2017). Curvature blindness illusion. i-Perception, 8(6), 2041669517742178.

Anque te paeza que, nesta imaxen, podemos ver tanto llínies curves como reutes en zigzag, en realidá ¡¡toles llínies son curves!! Ye una ilusión óptica. Si nun lo ves bien fíxate na esquina blanca d’arriba o na negra d’abaxo. Según l’autor, esto debese a que’l nuesu cerebru tiende a buscar lo reuto y les esquines porque ayudanos a reconocer los oxetos, resultanos más cenciello procesar les formes reutes.

Por último, mostraremosvos un pexe mui especial que comparte con nosotres y nosotros el so gustu poles llínies reutes y curves, y polos patrones. El macho d’esta especie de pexe globo crea pequeñes obres d’arte na arena pa conquistar a les hembres, les cuales lo emplegarán pa depositar los güevos. Equí podéis velo.

¿Vistis? ¿Nun-y alcontrais paecíu colos dibuxos fechos con los nuesos espirógrafos?

¿Qué faen los científicos y les científiques?

La ciencia qu’estudia los distintos tipos de llínies curves son les matemátiques, en concretu una rama perimportante nomá xeometría.

La xeometría lleva estudiándose milenta años, dende l’Antigüedá. A munches persones fascinaron-y dende entós fasta l’actualidá, los distintos tipos de formes que se repiten na naturaleza, nel nuesu entornu. Quiciabes, tú tamién tengas güeyos de xeómetra.

Una matemática nomada a la que tamién le fascinaron les curves foi Shopie Germain. Germain entamó a interesase por esta rama de la ciencia durante la época de la Revolución Francesa. Como nun podía salir de casa entamó a lleer llibros del so padre pa entretenese, adientándrose nel mundu de les matemátiques, la física y la química.

Pero temprano necesitó más, asina qu’entamó a deprender de forma atudidauta y al traviés de cartes con grandes matemáticos como Gauss o Lagrange. Na aquella época les muyeres nun eren tomaes en serio nes ciencies, asina que tuvo que facese pasar por un home pa poder siguir deprendiendo y en la so correspondencia. Sr LeBlanc era’l so pseudónimu anque, una vegada reconociose-y el so talentu, descubriose col so verdaderu nome, Sophie Germain.

Germain contribuyó a la xeometría introduciendo’l conceutu de curvatura media, amás, de ser precursora n’otres rames de les matemátiques ¡Una gran científica! Equí podéis ver la so biografía completa.

¿Queréis contanos daqué?

Prestaríanos poder acompañar les vueses esperiencies, anque sía dende la distancia. Por eso, estableceremos una vía de diálogu de forma virtual ¿Cómo lo fadremos?

  • Podéis unvianos les vueses duldes, suxerencies, esperiencies, etc. colos y les peques al corréu electrónicu, escribiendo nel asuntu del email “Unipeques en casa”.
  • Podéis siguinos nes redes sociales de la Universidá d’Uviéu, onde diremos publicando les novedaes d’esta páxina. Amás, si compartís les vueses esperiencies nes redes sociales, podéis mencionanos y emplegar el hashtag #unipequeencasa y #universidadparapeques.
  • Al traviés del nuesu canal de telegram y n’Instagram pa tar al día de les nueves publicaciones.

 

Artículo traducido por María Iglesias Orviz

La Universidad para peques/ Universidá pa guah.es / Children's University es un proyecto de la Universidad de Oviedo, que cuenta con la colaboración de la Fundación Española para la Ciencia y la Tecnología - Ministerio de Ciencia, Innovación y Universidades, Caja Rural de Asturias, Banco Santander, Grupo Hunosa, Ayuntamiento de Siero, APADAC, Pridental, Cluster TIC Asturias, DXC Technology, Lacera e ITVasa.

 

 

Enlaces rápidos