Inicio » Peques en casa

Peques en casa

El mundo n'espiral

02/06/2020

Pondremos les lentes de xeómetres pa buscar les espirales ya hélices que nos arrodien y ¡vamos construyir una culiebra gayolera!

El mundu que nos arrodia ta apináu d'infinites formes, colores, figures. Non siempres emprestamos muncha atención a estos detalles, pero, si tenemos los güeyos bien abiertos vamos poder afayar que delles formes repítense delles vegaes na naturaleza. Munches son fáciles de ver, ente qu'otres paecen escondese ente los oxetos y cuerpos que tán al nuesu alredor.

A lo llargo la hestoria munches persones trataron d’entender estes figures: ¿cuántes formes distintes pue haber? ¿hai relaciones ente elles? ¿qué propiedaes tienen? ¿por qué la naturaleza paez preferir delles d'elles? A partir de too esa conocencia, nació la xeometría, que ye la rama de les matemátiques qu'estudia les formes. Munches otres disciplines científiques como ye la física, la química, l'arquitectura, la inxeniería y munches más, precisen la xeometría pa desenvolvese.

Ente toes eses formes atopamos una perespecial: la espiral, coles sos llínees curves que paecen nun tener fin y qu’al movese amuésasenos hipnótica. Hai espirales n'elementos de la naturaleza (espirales inertes), en dellos seres vivos (espirales vivas) y tamién en munchos oxetos fabricaos poles persones (espirales cultes).

Güei vamos poner les lentes de xeómetres y vamos intentar ver el mundu n'espiral. Pa ello vamos construyir unes espirales bien guapes que vamos poner en movimientu más tarde.

¡Vamos entamar!

Materiales

  • Cartulina
  • Plantiya de culiebra, que podemos descargar equí.
  • Trocito de filo d'unos 50 cm
  • Ceres, llápices, rotuladores… cualesquier material col que podamos pintar (opcional)
  • Una fonte de calor, como pue ser una tostaora eléctrica o un radiador (opcional)

Afayamos

Podemos entamar poniéndonos les lentes de xeómetres ¿El qué ho?, taréis camentando. Pos vamos intentar ponenos unes lentes ficticies que nos faigan ver el mundu n'espiral, porque…¡el mundu ta enllenu d'elles! Pero, ¿per ónde?

Per un sitiu podemos atopar espirales en figures planes y por otru hélices, dacuando convertimos esa espiral nuna figura tridimensional.

Vamos entamar afitándonos o recordando les coses naturales ensin vida: roques, montes, ríos..¿ves dalguna? Equí vámos a amosate dos epirales inertes perxigantes:

¿Y nos seres vivos? ¿hai espirales y hélices vives?

A lo último, ente los oxetos que t'arrodien, aquellos fechos pol humanu y que llamamos formes cultes ¿cuántes yes capaz d’atopar? Pueden tar percerca tuya, coloca bien les lentes y mira ónde podemos atopales, estruyíes, ente munchos oxetos.

Agora que yá podemos ver el mundu n'espiral, ¡entamemos a construyiles!

¡Manes a la ciencia!

De xuru, intentemos dibuxar espirales munches vegaes ensin danos cuenta. Cuando faemos la concha d'un cascoxu o dibuxamos un remolín, tamos faciendo espirales. Equí proponémoste una espiral bastante chula porque ye…¡una culiebra! Dexámosvos una plantiya que podéis descargar ya imprimir, anque tamién podéis dibuxar la vuesa perfácil.

Podemos imprimila en papel normal y pegala nuna cartulina pa que tenga más consistencia. Tamién podemos decorala como más nos preste ¿Y si-y damos un pucuñín de color? Emplega lo que más quieras o tengas a mano, como ceres, rotuladores... Tamién podemos pintar distintos motivos, puntitos, llínees, etc. pa que nos quede una culiebra totalmente personalizada.

Otra idega xenial ye da-yos movimientu. Pa ello, equí encomendámoste... ¡facer una culiebra gayolera!

Na más que tenemos que retayar la llínea de la espiral. Dempués facemos un furacu na “ñariz" de la culiebra y metemos el filo per él. Pa qu’el filu nun escape, podemos face-y un ñudu gordu.

Agora na más queda que la nuesa culiebra entame a bailar ¿Cómo? Pos val con coyer la culiebra y ¡a correr! La culiebra va entamar a facer los sos movimientos ¿Y si xiramos sobro nós mesmos? ¿Qué forma de mover el nuesu cuerpu fadrá movese más a la culiebra?

Pa siguir esperimentando

¿Podríemos consiguir que la culiebra muévase sola como por arte de ciencia? ¡Pos claro que sí!

Una idea ye aprovechando’l calorín d'una tostaora. Vamos poner la tostaora xusto debaxo de la espiral, vamos prendela, esperamos un momentu pa que caliente y... ¡la culiebra va entamar a echar unos bailes!

Si nun tenemos tostaora o queremos ver a la nuesa culiebra baillar más díes ensin necesidá d'utilizar otros aparatos, aprovechanos del airucu que sopla cuando abrimos les nueses ventanes. Vamos asitiar la culiebra nel marcu de la ventana y, al abrir, ¡fiuuuuu! La culiebra va entamar a xirar.

Tamién podemos facer espirales d'otres maneres. Si quies probar, cueye un della llana o cuerda y muéyalo en témpera. Cueye unu de los estremos con una mano y dexa cayer l'estremu llibre na fueya. El restu la cuerda, dexámosla dir cayendo adulces endolcándola sobro l'estremu que posemos nel papel.

¿Qué faen los científicos y les científiques?

La ciencia qu'estudia les espirales ye la xeometría, una rama de les mates. Hubo munches y munchos, bien de xeómetres, pero güei vamos falate de Leonardo de Pisa, más conocíu como Fibonacci y de la so espiral áurea.

Fibonacci foi un matemáticu que, tres los sos viaxes per África y el mundu islámicu, traxo a Europa los númberos árabes (los qu'utilizamos anguaño, el 0,1,2…). De primeres, a la xente nun-yos gustaron estos nuevos númberos, preferíen siguir usando los romanos, pero, adulces, los númberos árabes llograron quedase ente nós, lo que nos fixo la vida más fácil.

Esti matemáticu, al que-y encantaben los númberos y l'arte, enzotose con atopar una operación matemática que definiera la guapura ¿Cómo l’atopó? Cuntando coneyos. Sí, lleísti bien, y ye que, reparando cuántos fíos teníen, atopó esta secuencia de númberos: 1, 2, 3, 5, 8, 13, 21...El nuevu númberu siempres ye la suma de los dos anteriores.

Con esos númberos fizo una espiral, llamándola la espiral áurea, yá que, según él, esta espiral atopábase en tolo que consideramos bello.

Anguaño esti tipu d'espiral sigue emplegándose en, por casu, fotografía, pintura…¿hai daqué onde tu puedas atopala?

¿Queréis contanos dalgo?

Encantaríanos poder acompañar les vueses esperiencies, anque sía dende la distancia.

Por eso, estableceremos una vía de diálogu de forma virtual ¿Cómo lo fadremos?

  • Podéis unvianos les vueses duldes, suxerencies, esperiencies, etc. colos y les peques al corréu electrónicu, escribiendo nel asuntu del email “Unipeques en casa”.
  • Podéis siguinos nes redes sociales de la Universidá d’Uviéu, onde diremos
  • publicando les novedaes d’esta páxina. Amás, si compartís les vueses esperiencies nes redes sociales, podéis mencionanos y utilizar l ́hashtag #unipequeencasa y #universidadparapeques.
  • Al traviés del nuesu canal de telegram tamién podéis siguinos y tar al día de les nueves publicaciones.

Artículo traducido por Elena González Menéndez

La Universidad para peques/ Universidá pa guah.es / Children's University es un proyecto de la Universidad de Oviedo, que cuenta con la colaboración de la Fundación Española para la Ciencia y la Tecnología - Ministerio de Ciencia, Innovación y Universidades, Caja Rural de Asturias, Banco Santander, Grupo Hunosa, Ayuntamiento de Siero, APADAC, Pridental, Cluster TIC Asturias, DXC Technology, Lacera e ITVasa.

 

 

 

Enlaces rápidos