Inicio » Peques en casa

Peques en casa

Espertamos granes

21/09/2020

Buscaremos granes, fadrémosles espertar y crearemos con elles un pequeñu huertu d'interior

¿Dalguna vegada parasteisvos a camentar nes plantes? Arródiennos per toes partes y ¡apórtennos tanto! Dannos oxíxenu, alimentu, solombra ya inclusive medicines… En definitiva, direuta o indireutamente los animales dependemos d’elles.

Pero ¿d’ónde vienen? Sabemos que les plantes terminen por marchitar y morrer, entos ¿cómo pue haber tantes? Esactu, porque puen reproducise, al igual que’l restu de seres vivos.

La nuesa casa, anque nun lo paeza ta enllena de granes. Buscarémosles, les fadremos espertar y crearemos con elles un pequeñu güertu d’interior.

¡Entamemos!

Material

  • Granes: llenteyes, garbanzos, fabes, tomates, freses, pimientos, calabacín, nueces… ¡tolo que se te asoceda!
  • Algodón o tierra
  • Tarros de vidriu, vasos vieyos, envases de yogures o güeveres
  • Bolses de conxelación trensparentes
  • Bayeta
  • Agua

Observaciones

Esta actividá va desenvolver mientres dellos díes, tenemos de ser pacientes y siguir el ritmu les plantes.

Pa reparar bien el procesu de guañada y crecedera de los raigaños, ye meyor emplegar bolses de plásticu o tarros de vidriu, en cuenta d’envases opacos. Podemos reutilizar recipientes que tengamos per casa.

En cuantes al usu del algodón o la bayeta, solo ye afechu pa granales y que crezan un pizcu. Antes o depués vamos precisar tresplantales a la tierra pa que puedan crecer.

Preparativos

Si queréis acelerar el procesu podéis poner les granes a remoyu’l día anterior; asina conseguiremos que dalgunes, como les llenteyes, entamen a granar al día siguiente de plantales.

Na más nos queda disponer los materiales requerios y yá vamos poder entamar.

¡Manes a la obra!

La nuesa casa ta enllena de granes: llegumes, frutos secos, nel interior de delles frutes y verdures… ¿cuántes distintes podemos atopar? ¡Qué entame la nuesa busca!

Tenemos qu'escoyer les granes que queremos facer granar. Ye interesante llantar munches de cada tipu pa, más tarde, poder esperimentar con elles y reparar les sos diferencies.

Una vegada escoyíes, vamos preparar el llugar onde la planta pueda nacer (granar). Amosémosvos dos opciones:

Nun frascu de vidriu, envase de yogur o similar

Amugamos l'algodón o, si tenemos tierra, echamos un pizcu d'agua fasta que tea bastante húmeda, (recuerda, un pocu, l'algodón o la tierra tampoco tienen que nadar, nun los queremos afogar).

Cuando tengamos preparada la casina de la planta a cencielles metemos la grana nel algodón o, si tenemos tierra, pondremosla sobro ella, cubriéndola depués con un pocoñín más, sobro unu o dos centímetros y, ¡llistu! La nuesa planta yá ta preparada pa nacer ¿bona verdá?

Si tamos emplegando un frascu de vidriu, ye interesante qu'asitiemos la grana nun llateral, pegáu a la paré del tarru. D'esta forma, vamos poder reparar meyor la guañada y crecedera de los raigaños.

Agora que tenemos delles granes plantaes, lo único que vamos precisar va ser echa-yos un pizcu d'agua (casi) tolos díes.

Nuna bolsina de plásticu

Otra forma mui eficiente ye asitiándola sobro una bayeta o algodón moyáo dientro d’una bolsa de plásticu, de les qu’empleguemos pa conxelar. Lo único que tenemos que facer ye moyar la bayeta o l’algodón y metela dientro la bolsa, bien estirada. Ye bona idea grapar la bayeta a la bolsa, aproximadamente a media altura, pa que se mantenga quieta nel so sitiu. Metemos les granes y cerramos la bolsa. Podemos colocala, con cinta adhesiva sobro’l cristal de la nuestra ventana, verás que rápido crecen.

Agora que tenemos varies granes plantaes, indicaremos con un rotu permanente o una pegatina, qué tipos de granes yeren, pa nun escaecenos o equivocanos.

¿Cuántes consiguimos xerminar? ¿Cuánto tiempo tardaron en facelo?

¿Esperimentamos un pizcu con elles?

Hai bien de factores que puen influyir na guañada de les granes. Podemos facer esperimentos y pescudar asina cuálos son les meyores condiciones. Encamentamos facer estos esperimentos con granes de llegumes como llenteyes o garbanzos, que son les que más rápidu y fácil granen, y va ser más fácil facer el siguimientu.

Temperatura: ¿qué-yos gusta más a les granes, el fríu o'l calor?

Pa poner a prueba les nueses hipótesis podemos dexar un frascu nun llugar fríu (esterior, nevera) y otru nun llugar templáu, como enriba dalgún electrodomésticu qu'emita calor (radiador, router, cpu del ordenador,...) ¿cuál va granar antes?

Agua: ¿Inflúi la cantidá y calidá de l'agua a la hora de granar?

Pa comprobalo, podemos caltener húmedu l'algodón de delles granes, dexar otru totalmente secu y contaminar l'agua d'una tercer grana, con, por exemplu, aceite puerco o xabón ¿Cuál va nacer primeru?

Pa siguir faciendo

Nesti otru artículu faémosvos una propuesta bien chula d'esperimentación colos nuesos granaos: el baille de les plantes.

Anque sía bien adulces, les plantes van granando, camudando y creciendo. Podemos dir rexistrando nel nuesu diariu STEAM tolo que vaigamos afayando, qué condiciones-yos son más favorables o cualquier cosa que nos interese y llame l'atención. D'esta forma, la nuesa plantina va tener el so propiu diariu y va cuntanos cómo va naciendo.

Podemos cultivar otros vexetales que tenemos por casa d'una manera un pocu distintu. Delles plantes puen reproducise asexualmente, esto ye, les sos fíes son hermanes que la so ma. Les pataques, cenahories, cebolles... puen reproducise d'esta forma.

  • Nel casu de les pataques, vamos cortar un trocín y vamos dexar dientro del algodón húmedo, al igual que les nueses granes.
  • Nel casu de les cenahories o l'apiu, vamos cortar la base y dexar nun concu con agua.
  • Pa les cebolles o ayos, a cencielles, vamos dexar nun concu con un pizcu d'agua na base.

¿Sabíes qué esisten bancos mundiales de granes? Estos bancos intenten almacenar granes de too tipu y de tolos llugares, intentando, qu'énte una catástrofe, crisis climática, guerra o estinción, les distintes especies de plantes nun suman del nuesu planeta. N'otres palabres, almacenen copies de seguridá. El bancu mundial de granes más importante del mundu ye'l de Svalbard, asitiáu nuna pequeña isla de Noruega, cercana al Polu Norte. Si quies velo y saber un poconñín sobro él, vas poder faelo al traviés d'esti vídeu 360.

 ¿Qué faen los científicos y científiques?

Los científicos y científiques encargaos d'estudiar el reinu de les plantes son los botánicos y botániques, una caña dientro de la bioloxía. Estes persones encarganse d'estudiar y conocer les plantes, l'efectu de la contaminación y les enfermedaes, la relación col suelu, l'atmósfera y otros seres vivos, etc. A última hora, tal que dicíamos, les plantes son esenciales pa la vida, por tantu'l so trabayu ye perimportante.

Una d'estes persones escepcionales nel so campu foi Mary Agnes Chase, quien llegó a clasificar miles de plantes alredor de too’l mundu y ellaboró un perimportante tratáu sobro les gramínees, vixente anguaño. Amás, lluchó pola muyer científica, siendo mentora de munches d'elles. Equí podéis lleer la so biografía completa.

¿Queréis cuntanos daqué?

Encantaríanos poder acompañar les vueses esperiencies, anque sía dende la distancia. Por eso, estableceremos una vía de diálogu de forma virtual ¿Cómo lo fadremos?

  • Podéis unvianos les vueses duldes, suxerencies, esperiencies, etc. colos y les peques al corréu electrónicu, escribiendo nel asuntu del email “Unipeques en casa”.
  • Podéis siguinos nes redes sociales de la Universidá d’Uviéu, onde diremos publicando les novedaes d’esta páxina. Amás, si compartís les vueses esperiencies nes redes sociales, podéis mencionanos y emplegar el hashtag #unipequeencasa y #universidadparapeques.
  • Al traviés del nuesu canal de telegram y en Instagram podéis tar al día de les nueves publicaciones.

Artículo traducido por María Iglesias Orviz

La Universidad para peques/ Universidá pa guah.es / Children's University es un proyecto de la Universidad de Oviedo, que cuenta con la colaboración de la Fundación Española para la Ciencia y la Tecnología - Ministerio de Ciencia, Innovación y Universidades, Caja Rural de Asturias, Banco Santander, Grupo Hunosa, Ayuntamiento de Siero, APADAC, Pridental, Cluster TIC Asturias, DXC Technology, Lacera e ITVasa.

 

Enlaces rápidos