Inicio » Peques en casa

Peques en casa

Pómpares de colores

27/05/2020

Fadremos pómpares de xabón de colores ya estamparemos les sos buelgues

Vamos dicir una pallabra que de xuru que vos va prestar: ¡¡pómpares!! ¿verdá que vos presten munchu? Si ye que… ¡¡son perfeutes!! De xuru que pasastis munchos ratos entreteníos faciendo ya esplotando pómpares de xabón.

Les pómpares son bien guapes. Ya efímeres. Son esfériques y perfráxiles. Nes pómpares podemos ver l’arcoíris. Ya algamen a volar y volar hasta que ¡¡plofff!!, terminen por esplotar. Y cuando esploten… ¡¡muéyennos!!

Y, amás, ¿sabíeis que n'una pómpara de xabón hai muuuncha ciencia?

Güei vamos facevos dalguna propuesta perguapa pa poder esperimentar con pómpares dientro casa.

Materiales

  • Pintures tipu témpera o acuarela líquida 
  • Xabón de fregar los cacharros
  • Agua
  • Paxes
  • Cacíu: boles pequeños, tacitas, frascos de vidriu 
  • Papel gordo. Lo ideal ye que sía papel d'acuarela, pero tamién valen cartulines o fueyes de papel.

Preparativos

Con esta xera va manchase un poco, asina que podemos buscar un llugar afayadizu pa facelo (por exemplu, la mesa la cocina). Podemos poner mandilones o mandiles, pa esperimentar con llibertá ensin mieu a estropiar la ropa.

Preparamos les pintures xabonoses, entemeciendo nun bol pequeñu dos cucharaes de témpera, dos cucharáes de xabón y una o dos cucharaes d'agua.

Fadremos tantes amiestos xabonosos como queramos, usando los colores que más nos presten.

Cortamos cachitos de papel d'acuarela.

Pa los y les más peques

Ye importante esplica-yos bien que tienen que SOPLAR pola paxa, y nun aspirar (como de normal faen). Ye bona idea prauticar enantes con agua.

Si les paxes son desechables, puede facése-yos un furacu pequeñu na parte de riba con daqué que pinche, y asina ye más complicao que-yos entre'l líquidu na boca si la suerben.

¡Manes a la ciencia!

Agora na más tenemos que meter la paxa nel amiestu xabonoso y ¡¡soplar!!

 

Cuando tengamos un bon monte de pómpares, ponemos sobro elles, tapando'l cacíu, una fueya. La buelga de les nueses pómpares va quedar estampada.

 

Pa siguir esperimentando 

  • Tamién podemos estampar pómpares n’una fueya a cencielles utilizando pomperos. Metemos el pomperu na nuesa pintura xabonosa y soplamos selemente sobro'l papel d'acuarela.

  • Podemos fabricar los nuesos propios pomperos usando materiales reciclaos, limpiapipes…  O emplegar dalgún que tengamos per casa.

  • Cuando ensuguen los papeles, van quedar creaciones bien guapes y orixinales que podemos utilizar pa siguir creando.

  • Con peques más grandes podemos probar distintos tipos de pintures, de proporciones nel amiestu, etc.

¿Queréis contanos dalgo?

Encantaríanos poder acompañar les vueses esperiencies, anque sía dende la distancia. Por eso, estableceremos una vía de diálogu de forma virtual ¿Cómo lo fadremos?

  • Podéis unvianos les vueses duldes, suxerencies, esperiencies, etc. colos y les peques al corréu electrónicu, escribiendo nel asuntu del email “Unipeques en casa”.

  • Podéis siguinos nes redes sociales de la Universidá d’Uviéu, onde diremos publicando les novedaes d’esta páxina. Amás, si compartís les vueses esperiencies nes redes sociales, podéis mencionanos y utilizar l´hashtag #unipequeencasa y #universidadparapeques.

  • Al traviés del nuesu canal de telegram tamién podéis siguinos y tar al día de les nueves publicaciones.

Artículo traducido por Elena González Menéndez

 

La Universidad para peques/ Universidá pa guah.es / Children's University es un proyecto de la Universidad de Oviedo, que cuenta con la colaboración de la Fundación Española para la Ciencia y la Tecnología - Ministerio de Ciencia, Innovación y Universidades, Caja Rural de Asturias, Banco Santander, Grupo Hunosa, Ayuntamiento de Siero, APADAC, Pridental, Cluster TIC Asturias, DXC Technology, Lacera e ITVasa.

 

 

 

Enlaces rápidos