Inicio » Peques en casa

Peques en casa

Circuitos magnéticos

28/07/2020

Vamos poner en práctica los nuesos conocimientos sobre imanes pa construyir un xuguete magnéticu

El magnetismu ye un fenómenu misteriosu, pero más accesible de lo qu'imaxinamos.  Nesti artículu presentámosvos una propuesta d'esploración con imanes, que nos dexaría afayar un montón de coses sobre ellos, sobre los materiales qu'atraen (magnéticos) y sobro la capacidá estes fuercies invisibles (campu magnéticu) de trespasar oxetos. Asina que ye momentu de poner estes conocencia en práctica, y convertinos n'inxenieros ya inxenieres ¡creando un xuguete!

Nesta segunda propuesta magnética vamos facer un circuitu bien risonderu, onde unos “coches” bien especiales van movese...¡como por arte de ciencia!

Materiales

  • Imán
  • Cartulina o, nel so defectu, una fueya de papel y un cartafueyu de plásticu tresparente.
  • Rotuladores y/o ceres
  • Material magnéticu pequeñu: Clips, chapes, llimpiapipes, etc

Material pa personalizar l'oxetu móvil:

  • Pa clips: pedacinos de papel en forma de cuadráu, d'unos 3 o 4 cm de llau aproximao.
  • Pa les chapines: plastilina, güeyinos, pedacinos de cordel, etc.

Preparativos

  • Cortamos la cartulina del tamañu averáu de mediu foliu. Otra opción ye, si nun tenemos cartulina, retayar una fueya de papel a la metá y, dempués de dibuxar el circuitu, introducila nun cartafueyu que vamos retayar tamién, afaciéndolu al tamañu de la fueya. Esto ye porque precisamos que'l papel seya lo suficientemente ríxidu como pa caltenese argutu al garralu per un llateral.
  • Pa personalizar el clip, vamos precisar cuadraos pequeños de papel, que vamos retayar primeramente.

Observaciones

Realmente, namás ye imprescindible un material magnéticu pequeñu, anque si disponemos de dellos (clips, chapes, llimpiapipes, etc.), vamos poder crear dellos y distintos “oxetos móviles”, arriqueciendo asina l’actividá.

Afayamos

Yá sabemos que los imanes atraen los clips o les chapes, pero ¿ye quien esta fuercia invisible a trespasar el papel? Prueba a poner sobre la cartulina un clip y, per debaxo, l'imán. Si movemos l'imán, ¿va movese'l clip?

¡Manes a la ciencia!

Proponémosvos convertir el clip o la chapina nun móvil que circula per un circuitu diseñáu por nós.

Pa ello, lo primero que tenemos que facer ye crear el circuitu. Vamos dibuxar una llinia o carretera sobre'l papel, lo que más quieras. Tamién puedes dibuxar o pintar lo que más te preste alredor, como si fuera'l paisaxe del circuitu.

Agora vamos construyir el coche.

Si utilizamos clips, puedes dibuxar nunu de los pedacinos de papel lo que quieras ¿Quies más que'l circuitu seya de coches? Pues pintamos un coche ¿Prestaríate que fora una carrera de pies? Pues dibuxamos un pie, ¡namás tienes qu'usar la to imaxinación! Cuando termines el diseñu, introduz el papelín nel clip.

Si utilizamos una chapa, puedes pintala colo que más te guste, rellenala de plastilina y encuallar pequeños oxetos como güeyinos, pedacinos de cordel, etc.

Si usamos un llimpiapipes puedes da-y la forma que más te preste

Podemos probar a personalizar dellos oxetos, de la manera que prefieras

Yá lo construyimos too,  asina qu'agora llega la parte más risondera… ¡xugar!

Pa ello vamos tener pola cartulina pel centru d'un llateral. Vamos poner el nuesu pequeñu oxetu magnéticu sobre'l nuesu circuitu y, debaxo del mesmu, l'imán. Moviendo l'imán, el nuesu oxetu va paecer que se mueve solu pel circuitu.

Pa siguir esperimentando

Dende equí proponémoste la realización d'un circuitu, pero podemos construyir munchos otros xuguetes aprovechando que la fuercia del imán tien la capacidá de trespasar oxetos ¿Y si en cuenta d’un circuitu diseñamos una montaña rusa?, ¿o un globu xubiendo pel aire?, ¿y si ponemos torgues con, por casu, un mizcu de plastilina?, ¿va poder travesalo?

Si te prestó esta propuesta y te presta xugar con imanes, llueu amosarémoste más idees magnétiques pa facer en casa.

Nesta páxina web del CSIC vais atopar un manual bien completu sobre magnetismu con munches más propuestes y esperimentos que pueden faese en casa. 

¿Queréis cuntanos daqué?

Prestaríanos pola vida poder acompañar les vueses esperiencies, anque seya dende la distancia. Por eso, vamos establecer una vía de diálogu de forma virtual. ¿Cómo lo fadremos?

  • Podéis unvianos les vueses duldes, suxerencies, esperiencies, etc. colos y coles guah.es al corréu lletrónicu, poniendo nel asuntu del corréu  “Unipeques en casa”.
  • Podéis siguinos nes redes sociales de la Universidá d'Uviéu, onde vamos dir espublizando les novedaes d’esta páxina. Amás, si compartís les vueses esperiencies en redes sociales, podéis mentanos y utilizar el hashtag #unipequesencasa y #universidadparapeques #universidapaguahes.
  • Al traviés de la nuesa canal de telegram y en Instagram tamién podéis siguinos y tar al día de les nueves espublizaciones.

 

La Universidá pa guah.es / Universidad para peques / Children's University ye un proyectu de la Universidá d'Uviéu, que cunta cola collaboración de la Fundación Española pa la Ciencia y la Tecnoloxía - Ministeriu de Ciencia, Innovación y Universidaes, Caxa Rural d'Asturies, Bancu Santander, Grupo Hunosa, Conceyu de Siero, APADAC, Pridental, Cluster TIC Asturies, DXC Technology, Lacera ya ITVasa.

 

 

Enlaces rápidos