Inicio » Peques en casa

Peques en casa

Descubriendo les solombres

21/09/2020

Xugaremos con lluces y solombres, colos sos posibles colores, col nuesu cuerpu y crearemos títeres de solombres.

Les solombres arródiennos, persíguennos… Cuando hai lluz, les solombres entamen a apaecer, pero ¿Qué sabemos sobro elles? ¿Cómo surden? ¿Son toes iguales? ¿Ye posible crear solombres de colores?

Pa poder facer solombres precisamos lluz y un oxetu pol qu’esa lluz nun pueda pasar (opacu). Hai solombres con formes bien estremaes, pero ¿sabíes que pue haber solombres de colores?

La lluz blanco, como quiciabes yá sepas, ta formada por tolos colores del arcoíris. D’ente toos ellos, hai trés colores que son perimportantes: el coloráu, el verde y l’azul.

Combinando lluces d’esos trés colores ¡podemos crear tolos demás! A esos trés colores nomámoslos colores primarios de la lluz.

Quiciabes teas pensando que teníes otra idea sobro los colores primarios, qu’estos yeren l’azul cián, el maxenta y el mariellu. Pues ¿sabes? tienes razón, pero esos colores son los primarios de los pigmentos, como les témperes o les acuareles coles que seique xugaste dalguna vegada.

Xuntando los trés colores primarios de la lluz n’igual proporción, la lluz va vese blanca, pero si xuntamos lluz colorao con lluz azul, veremos lluz maxenta; lluz verde con lluz azul, lluz cian; lluz colorao con lluz verde, lluz mariello ¿prestaríate comprobalo?

Al traviés d’esta propuesta xugaremos con lluces y solombres, colos sos posibles colores, col nuesu cuerpu y crearemos títeres de solombres. Comprobaremos que podemos crear solombres d’estremaos colores, cubriendo focos de lluz con celofán colorao, verde y azul. Presentámosvos a los colores primarios de la lluz.

¡Entamamos!

Materiales

Pa xugar coles solombres:

  • Trés focos de lluz: llinternes, llámpares o flexos.
  • Celofán de los trés colores primarios de la lluz: verde, colorao y azul. Si nun tenemos celofán podemos pintar con rotulador permanente un plásticu, emplegar teles d’esos colores o pintar unes fueyes.
  • Gomes o celo pa garrar el celofán al focu.
  • Oxetos con distintos cuerpos: tresllúcidos, opacos, tresparentes. Por exemplu: celofán de colores, servilletes, dalgunos de los tos xuguetes, vasos de plásticu, dalgún tupper, teles fines o pañuelos, etc.
  • Una superficie llisa y clara que nos sirva como pantalla. Pue ser una paré, un mueble, el teyáu o el suelu. Tamién podemos poner papel blanco na superficie que tengamos disponible.

Pa crear los títeres de solombres:

  • Cartulines.
  • Tisories.
  • Pegamín o celo.
  • Cordones, filo, cuerdes, llazos, palillos, llimpiapipes…
  • Palos, llápices o dalgún tipu de soporte pa poder apegar les cartulines.

Observaciones

Podríase precisar enchufe, poro, la supervisión d’una persona adulta nel momentu del so usu.

Si tar con la lluz apagada, anque non sía a oscures, fáenos sentinos incómodos, podemos graduar la persiana o les cortines como precises. Nun ye necesario tar completamente a escures pa xugar con solombres.

Si nun tenemos trés focos pa facer solombres de colores, podemos igualmente xugar coles solombres, descubrir munches coses interesantes sobro elles y facer los títeres.

Preparativos

  • Buscamos una zona escura de la casa pa facer l’actividá, al pie d’una paré o una superficie llisa que nos faiga de pantalla, y a poder ser que tenga sitiu abondo pa xugar nel suelu.
  • Preparamos les nueses lluces de colores colorao, verde y azul. Pa ello, colos focos o llinternes apagaes, cubrimoslos con papel de celofán. Podemos emplegar una goma o celo pa garralo.

  • Asitiamos nuna bandexa los oxetos qu’escoyimos pa investigar.
  • Podemos disponer de música de fondu mientres esploramos coles solombres, daqué que nos pueda inspirar.
  • Les persones adultes podemos preparar dellos títeres de solombres cenciellos pa que los y les peques xueguen con ellos y sirvanyos como inspiración pa la posterior creación de los sos propios títeres.

¡Manes a la ciencia!

Xugamos coles solombres

Una vegada que tengamos l’espaciu y los materiales preparaos, ye’l momentu de prender los nuesos focos, enfocalos escontra la nuesa pantalla y apagar la lluz del cuartu.

  • ¿Cómo nos sentimos?

De primeres cuesta adautar los sentíos a la escuridá pero adulces veremos meyor y sentiremos más comodidá. Cuando yá teamos preparaos y preparaes ¡podemos entamar a xugar!

Enantes d’emplegar ningún oxetu,

  • ¿Qué repares?
  • ¿Ónde ta la to solombra?
  • ¿Qué tamañu tien?

Pues probar a ponete delantre los focos, detrás, averate, alloñate. Averar o alloñar les manes, los pies… ¡¡too lo que se t’asoceda!!

  • ¿La solombra ye siempres igual?
  • ¿Podríes facer que la solombra fáigase más grande o más pequeña? ¿Por qué crees que socede?
  • ¿Cuántos colores ves y cómo se formen?

Pues probar a tapar unu de los focos ¿qué color sal?

Y con el restu d’oxetos que preparasti,

  • ¿Pasará lo mesmo?

Prueba a poner cada oxetu qu’escoyisti nes mismes posiciones qu’el to cuerpo con respectu al focu: delantre, detrás, cerca y lloñe. ¿En qué s’estremen?

Si pones un oxetu tresparente o tresllúcidu d’otru color nuno de los focos,

  • ¿Qué color formen?

Teatru de solombres

Vamos poner en marcha la nuesa creatividá y fantasía creando’l nuesu propiu teatru de solombres. Colos materiales qu’escoyimos y muncha imaxinación faeremos los personaxes y el decoráu necesario.

Podemos partir d’una hestoria o un cuentu que nos preste o a cencielles dexanos llevar ya inventalo too.

Pa facer los nuesos títeres necesitaremos una cartulina, que recortaremos y decoraremos como queramos, y a la que-y apegaremos un palu o un llápiz colo que poder garralo cola mano. D’esti mou podremos movelu y danzalu cerca o lloñe del focu y xugar cola so solombra. Y asina con tantos personaxes como deseemos crear. Una siella o unes caxes servirannos d’escenariu.

¡Qué entame la función!

Pa siguir esperimentando

El xuegu delantre de (y con) los focos de lluces de colores ye “máxicu” y estimula muncho la imaxinación y la creatividá. Ye bona idea, si podemos, preparar un espaciu de solombres en casa y dexalo unos díes ¡de xuru que dará munchu xuegu!

Podemos dir preparando pequeñes provocaciones cada día qu’afalen a la creación de minimundos, por exemplu: una bandexina con moñecos pequeñinos, dalgún material de construcción tipu lego, animales de xuguete, etc.

Hai munchos más xuegos con solombres, tan sólo tenemos que dexar volar la nuesa imaxinación. Por exemplu, ¿sabes que pueden ayudanos a dibuxar? Asitia un oxetu, como un peluche o una figura sobro´l papel y una llámpara al llau pa que produzca la solombra, que tará sobro’l papel. Marca’l contornu con un llápiz y ¡saldrate un dibuxu perguapu!

¿Sabíes qué? La mayor solombra que podemos ver ye una que, dacuando, pue formar la lluna y el sol. A esti fenómenu nomámoslu eclipse solar y la so solombra pue algamar… ¡270km! Si quies saber más, mira esti vídeu.

Otros recursos interesantes

  • Equí podemos descubrir cuántes solombres diferentes podemos facer coles nueses manos.
  • Un artista australianu emplega les sos manos pa contanos una hestoria con música.
  • El cuentu ilustráu “A qué sabe la luna”, de Michael Grejneiec, ed. Kalandraka como teatru de solombres.
  • Otru cuentu maravillosu ye “Sombras” de Suzy Lee, Barbara Fiore Editora. En esti enllace podéis ver un cachín del cuento. Anque falta’l final, merez la pena.

¿Queréis cuntanos daqué?

Encantaríanos poder acompañar les vueses esperiencies, anque sía dende la distancia. Por eso, estableceremos una vía de diálogu de forma virtual ¿Cómo lo fadremos?

  • Podéis unvianos les vueses duldes, suxerencies, esperiencies, etc. colos y les peques al corréu electrónicu, escribiendo nel asuntu del email “Unipeques en casa”.
  • Podéis siguinos nes redes sociales de la Universidá d’Uviéu, onde diremos publicando les novedaes d’esta páxina. Amás, si compartís les vueses esperiencies nes redes sociales, podéis mencionanos y emplegar el hashtag #unipequeencasa y #universidadparapeques.
  • Al traviés del nuesu canal de telegram y en Instagram podéis tar al día de les nueves publicaciones.

Artículo traducido por María Iglesias Orviz

La Universidad para peques/ Universidá pa guah.es / Children's University es un proyecto de la Universidad de Oviedo, que cuenta con la colaboración de la Fundación Española para la Ciencia y la Tecnología - Ministerio de Ciencia, Innovación y Universidades, Caja Rural de Asturias, Banco Santander, Grupo Hunosa, Ayuntamiento de Siero, APADAC, Pridental, Cluster TIC Asturias, DXC Technology, Lacera e ITVasa.

 

 

Enlaces rápidos