Inicio » Peques en casa

Peques en casa

Diariu STEAM

28/07/2020

Vamos ellaborar el nuesu diariu STEAM y vamos entamar a ¡llenalu de ciencia!

Como siempres dicimos na Universidá pa guah.es, la ciencia arródianos. Agora que tamos pasando enforma tiempu en casa, tenemos una pergrande oportunidá pa entamr a mirar al nuesu alredor, reparanado en too con detenimientu y ¡¡buscar la ciencia!!

Y, ¿qué vos paez si vamos guardando toos esos descubrimientos de dalguna manera?

Proponémosvos facer un diariu STEAM mientres estos díes. Pue ser una caxa, una llibreta, ¡o les dos coses! Nél vamos poder guardar, dibuxar o escribir la información qu’atropamos nes nueses observaciones. Los intereses, descubrimientos, inventos, reflexones, tolo que mos asoceda y llame la nuesa atención.

Los científicos y científiques utilicen cuadernos de campu o de llaboratoriu pa rexistrar la información de lo que vean y poder analizar les resultancies de les sos esploraciones y esperimentos.

Proponémosvos diseñar el vuesu propiu diariu STEAM y ¡enllenalu de ciencia!

Materiales

  • Una caxa, por casu de zapatos
  • Una llibreta. Si nun tenemos llibreta, tamién podemos usar folios, o tarxetes de cartulina
  • Rotuladores, llápices, bolis, pegatines, acuareles, etc
  • ¡Y muncho  interés!

Observaciones

  • La caxa va sirvinos pa meter nella aquello que nos paeza chocante y pueda complementar el nuesu cuadernu.
  • Tantu la caxa como’l cuadernu vais poder diseñalu o decoralu al vuesu gustu y personalidá.
  • Nun vos esmolezáis si agora nun vos asocede nada, vais utilizalu munches vegaes, asina que vais poder dir dándo-y forma adulces. Lo más importante ye que vos resulte cómodu y esfrutéis colo qu'escribáis o vaigáis añadiendo.

Pa guah.es más guah.es

Colos y les más guah.es podemos crear una caxa STEAM na que puedan dir metiendo les sos pequeñes ayalgues con ciencia. Pue ser tamién interesante facer un pequeñu álbum con semeyes, si tenemos posibilidá d’imprimiles en papel.

Afayamos

Entá güei guárdense los diarios qu’utilizaben los grandes científicos y científiques, como por casu el de  Madame Curie, qu’inda a día de güei sigue siendo radioactivu. Nesti otru enllaz  vais poder caciplar el cuadernu d’Isaac Newton  y de Darwin.

¡Manes a la ciencia!

Yá tenemos el nuesu diariu y agora, ¿qué? Equí dámosvos delles idees.

Podemos estremar el nuesu cuadernu en secciones:

  • Coses chocantes de la redolada: lo que vemos nel nuesu día ente día, por casu, les plantes qu’hai en casa, cuándo se fai de día, etc.
  • Esperimentos: qué pasaría si...
  • Qué me prestaría investigar: cómo llega l’agua a les nueses cases, cómo ye posible que sintamos la voz al traviés del teléfonu, por qué nel mio cuartu da'l sol pela tarde y non  pela mañana, etc.
  • Científicos y científiques que toi conociendo o me prestaría conocer.
  • Llista de recursos onde investigar: aquellos llibros, páxina web o persones a les que puedo allegar y ayuden nes mios investigaciones.

Y añadir imáxenes, retayos, dibuxos, tolo que creáis que pue apurrir al vuesu cuadernu/caxa. 

Podemos recoyer datos nel cuadernu:

Lo primero que vamos precisar ye poner la fecha d'esi día y llugar onde asocede lo que vamos escribir o dibuxar. Depende de lo que vaigamos observar, pue ser interesante la hora.

Cuando veamos daqué que nos llama l'atención, por casu, si tenemos dalguna planta en casa, podemos observala, dibuxala, ¿cómo ye?, ¿qué fai?, ¿qué m'intriga?, ¿prestaríame saber más? Mientres unos díes podemos apuntar o dibuxar si vemos cambeos, qué tamos pescudando sobre ella, sobre les sos necesidaes pa subsistir. ¿Paécense a les nueses?

O cuando facemos dalguna actividá de la “Universidá pa guah.es en casa” podemos apuntar ¿qué fixi?, ¿qué afayé?, ¿preciso volver intentalo?, ¿en qué falló?, ¿cómo foi'l segundu intentu?.

Ye bien importante que terminemos con unes conclusiones o reflexones sobre lo asocedío. ¿Cómo te sentisti?, ¿paecióte complicao?, ¿volveríes facer?, ¿fadríes dalgún cambéu? Y si te pruye, vuelves repitir, apuntando de nuevu nel diariu qué t'apurrió esta esperiencia.

Ampliaciones

Escribir o dibuxar ayuda a qu’espresemos delles emociones o pensamientos que cola voz diba costanos más espresar.

Amás de realizar un diariu sobre lo qu’observamos, tamién podemos tener intereses sobre lo qu'asocede nel nuesu interior. Crear un diariu pa escribir o dibuxar pensamientos, emociones, suaños o ilusiones, pue resultanos bien útil y va ayudanos a conocenos más y en munches ocasiones a sentinos meyor en determinaos momentos y dir deprendiendo a espresalo. 

¿Queréis cuntanos daqué?

Prestaríanos pola vida poder acompañar les vueses esperiencies, anque seya dende la distancia. Por eso, vamos establecer una vía de diálogu de forma virtual. ¿Cómo lo fadremos?

  • Podéis unvianos les vueses duldes, suxerencies, esperiencies, etc. colos y coles guah.es al corréu lletrónicu, poniendo nel asuntu del corréu  “Unipeques en casa”.
  • Podéis siguinos nes redes sociales de la Universidá d'Uviéu, onde vamos dir espublizando les novedaes d’esta páxina. Amás, si compartís les vueses esperiencies en redes sociales, podéis mentanos y utilizar el hashtag #unipequesencasa y #universidadparapeques #universidapaguahes.
  • Al traviés de la nuesa canal de telegram y en Instagram tamién podéis siguinos y tar al día de les nueves espublizaciones.

 

La Universidá pa guah.es / Universidad para peques / Children's University ye un proyectu de la Universidá d'Uviéu, que cunta cola collaboración de la Fundación Española pa la Ciencia y la Tecnoloxía - Ministeriu de Ciencia, Innovación y Universidaes, Caxa Rural d'Asturies, Bancu Santander, Grupo Hunosa, Conceyu de Siero, APADAC, Pridental, Cluster TIC Asturies, DXC Technology, Lacera ya ITVasa.

 

 

Enlaces rápidos