Inicio » Peques en casa

Peques en casa

El baille de les plantes

21/09/2020

Fadremos esperimentos que permitiránnos descubrir que ¡les plantes muévense!

Dependemos de les plantes pa poder vivir. Sicasí, siguimos camentando nelles como habitantes del mundu de segunda clase. Inclusive, cuando somos bien peques, nin siquier paécennos seres vivos. Esto asocede, a cencielles, porque nun les vemos movese, pero en realidá ¡sí que lo faen! Lo qu’asocede ye que los sos movimientos son demasiao lentos pa los nuesos güeyos animales, con una vida muncho más activa.

Les plantes respuenden a lo qu’ocurre al so alredor nun movimientu que, n’ocasiones, paez un baille acompasáu por aquello que les fai caltenese vives. Na propuesta de güei convidámosvos a baillar con elles y adientranos asina un poco más nesti maraviyosu reinu.

¡Entamemos!

Materiales

  • Granes yá xerminaes
  • Paxites, un llápiz vieyu o cualesquier oxetu alargáu y finu
  • Trocín de filo
  • Tapón pequeñu
  • Agua
  • Móvil o táblet con cámara (opcional)

Observaciones

Pa poder facer esta actividá, vamos emplegar granes yá xerminaes. Si tovía nun lo ficistis, podeis consultar esti artículu nel que os cuntábamos cómo espertar granes.

Igual qu’asocedía cola xerminación, la observación del movimientu de les plantes sedrá un procesu lentu, polo que tenemos que tener paciencia, esperando en dalgunos casos, dellos díes.

Pal esperimentu del oxetu estrañu ye preferible facelo con una faba xerminada.

Descubrimos

Les plantes tienen dos tipos de movimientos, unos afecten a la so crecedera (tropismos), mientres qu’otros son reversibles (nastias). Tamién, dalgunes plantes puen movese abondo rápido ¡comer animales! Sí, leisti bien, les plantes carnívores puen alcontrar parte del so sustentu asina, pero nun t’esmolezas, nun puen comenos, solo a pequeños invertebraos.

Si quieres conocer dalguna curiosidá de les plantes pues visualizar esti vídeu.

¡Manes a la ciencia!

Tal que vimos enantes, les plantes muévense al compás d’aquello que les caltien vives pero ¿qué ye lo que-yos inflúi? ¿a qué respuenden? ¡Podemos esperimentar con elles y descubrilo!

Sabemos que les plantes precisen agua y sales minerales qu’atopamos nel suelu, pero… ¿son capaces d’alcontralo? ¿Cómo puen facelo? ¿Saben lo que ta enrriba y lo que ta embaxo?

Pa descubrilo proponémosvos un esperimentu cenciellu: tumbar el nuesu tarru y observar la planta al día siguiente ¿sigui creciendo igual? ¿escontra ónde va agora’l tallu? ¿y les raíces?

Cuando nos alcontremos nel esterior y danos la lluz del sol, suel prestanos, animámosnos a movenos y xugar, pero ¿pasarayos lo mesmo a les plantes? Quiciabes tengas una col tallu lixeramente inclináu, mirando escontra la ventana ¿y si xirámosla dándo-y el llombu a la lluz? ¿buscará la lluz la planta?

¡Qué rica ta l’agua cuando tenemos sede! Nosotros sabemos onde podemos atopar agua pa beber, pero ¿podrán facer lo mesmo les plantes? Pa pescudalo pues dexar un tapón con agua nun lateral del tarru, al pie de les raíces. Pasaos unos díes ¿escontra ónde crecen les raíces?

Pa continuar faciendo

Pudimos observar movimiento nes plantes pasaos unos díes o unes hores, viendo que, depués d’esi tiempu, camudaron. De toes formes, siguinos costando observar el so lentu movimientu.  ¿Y si grabamos un vídeu a cámara rápida? Cola aplicación gratuita stop motion podemos montalo a partir de semeyes feches esactamente dende’l mesmu llugar. Fai una cada hora durante un día y aseguramoste qu’l resultáu sorprenderate. Equí pues ver unu nel que se pue apreciar la xerminación y crecedera d’una planta.

L’aplicación pues descargala dende’l play store si emplegues un móvil o tablet.

Tamién, como bonos científicos y científiques que somos, podemos ir anotando o dibuxando los cambeos nel nuesu cuadernu STEAM.

Pa saber más

Esisten dalgunes plantes un poco tímides que, en contautu con un oxetu, muévense bastantina rápido. Falamos de les plantes sensitives, por exemplu la mimosa púdica o vergonzosa, que nun tienes que confundir col árbol de la mimosa.

La mimosa respuende al tautu, de forma que les sos fueyes y tallu pliéguense, intentando protexese de posibles depredaores ¿apatezte ver como se mueve?

Y de nueche ¿podemos ver una planta dormir? Les plantes tienen ritmos circadianos similares a los de los animales y, de nueche tamién podemos observales preparándose pa dormir. Fíxate sobro too nes flores y en cómo los sos pétalos se replieguen. Por exemplu, a estes margarites, ta entrándoyos el sueñu ¡Buenes nuches margarites! ¡Ta mañana!

¿Queréis contanos daqué?

Encantaríanos poder acompañar les vueses esperiencies, anque sía dende la distancia. Por eso, estableceremos una vía de diálogu de forma virtual ¿Cómo lo fadremos?

  • Podéis unvianos les vueses duldes, suxerencies, esperiencies, etc. colos y les peques al corréu electrónicu, escribiendo nel asuntu del email “Unipeques en casa”.
  • Podéis siguinos nes redes sociales de la Universidá d’Uviéu, onde diremos publicando les novedaes d’esta páxina. Amás, si compartís les vueses esperiencies nes redes sociales, podéis mencionanos y emplegar el hashtag #unipequeencasa y #universidadparapeques.
  • Al traviés del nuesu canal de telegram y en Instagram podéis tar al día de les nueves publicaciones.

Artículo traducido por María Iglesias Orviz

La Universidad para peques/ Universidá pa guah.es / Children's University es un proyecto de la Universidad de Oviedo, que cuenta con la colaboración de la Fundación Española para la Ciencia y la Tecnología - Ministerio de Ciencia, Innovación y Universidades, Caja Rural de Asturias, Banco Santander, Grupo Hunosa, Ayuntamiento de Siero, APADAC, Pridental, Cluster TIC Asturias, DXC Technology, Lacera e ITVasa.

 

 

 

Enlaces rápidos