Inicio » Peques en casa

Peques en casa

Equilibristes

28/07/2020

Vamos construyir moñecos equilibristes y vamos afayar el centru de mases

La propuesta de güei xira alredor del centru de mases d'un cuerpu. Guah.es y non tan guah.es vamos poder esfrutar d'equilibrios n'apariencia imposibles y afayar xugando la ciencia que s'escuende detrás de qu'un oxetu caiga o non ¡Güei vamos poder facer física ya inxeniería construyendo unos moñecos que podrán sostenese y baillar sobre la punta del nuesu deu!

Materiales

  • Palos de xeláu (x4)
  • Pegamín fuerte o pistola de silicona
  • Plastilina
  • Material variao pa decoración: papeles y cartulines de colores, llimpiapipes, cintes de colores, llanes, teles, güeyinos, papel d'aluminiu, rotuladores… ¡cualesquier cosa que nos motive va sirvir!
  • Pegamenín o cinta de pegar

Preparativos

Les families vamos crear el moñecu de mano, pegando los palos de xeláu (1) de la siguiente manera:

  1. Garrando unu de los palos en posición vertical, pegarémos-y un palu pela parte d’atrás (2) y otru per delantre (3), faciendo de pates del moñecu.
  2. Pegamos l'últimu palu (4) en posición horizontal nel terciu superior al palu principal, asemeyando los brazos. Si tenemos palos de xelaos de distintu tamañu, podría utilizase unos más pequeños pa esti cometíu.
  3. Una vegada tea preparáu'l moñecu, vamos ponelu sobre la mesa xunto col restu de materiales, creando una guapa provocación que convide a entamar l'actividá.

Afayamos

¿Sabéis que tamos arrodiaos y arrodiaes d'equilibrios imposibles? Inclusive hai persones que los convierten en distintes formes d'arte:

Escultures cinétiques: www.youtube.com/watch

Equilibristes Circu del Sol: www.youtube.com/watch

¡Manes a la ciencia!

Como vamos ver, al sofitar l'estremu del palu sobre'l deu, el moñecu va cayer

Retu: ¿Podríamos convertir al nuesu moñecu nun equilibrista profesional y facer que se caltenga sobre'l nuesu deu utilizando plastilina? Eso sí, nun podemos poner sobre'l nuesu deu o sobre'l culín del moñecu.

Posible solución: ¿Y si-y ponemos zapatos al moñecu con dos boles de plastilina? ¿va caltenerse n'equilibriu? ¿Qué va pasar si-y ponemos guantes? ¿Y si-y ponemos namás unu?

Podemos decorar el nuesu equilibrista y xugar con él, probando a posalu sobre distintes superficies, aumentando o menguando la masa de les boles de plastilina, camudando'l llugar onde s'atopen, etc.

Pa siguir esperimentando

Esisten esperimentos a embute rellacionaos col equilibriu y el centru de mases colos que poder maraviyanos. Dexámosvos delles idees:

Escultures cinétiques

Con namás plastilina y dalgún encontu como palos, paliyos, llápices… podemos crear escultures cinétiques sorprendentes.

Lata n'equilibriu

¿Podríes caltener una lata n'equilibriu sofitándose namás nel cantu? ¿Sabes cuálu ye'l trucu?

Efectivamente, ¡xugar nuevamente col centru de mases! Pa ello, vamos enllenar la lata d'agua hasta una cuarta parte de la mesma. Vas poder dir echando agua y esperimentando hasta qu'atopes el puntu esactu nel que se caltién la lata.

Tenedores equilibristes

Y agora, otru retu ¿podríais caltener n'equilibriu dos tenedores sobre un paliyu?

Namás tenemos qu'engabitar los dientes del tenedor y ensertar dientro un paliyu. Si nun te sal a la la primera, ten paciencia, acabarás por consiguilo.

El nuesu centru de mases

¿Y si intentamos caltener n'equilibriu los nuesos propios cuerpos?, ¿sabes cuálu ye'l to propiu centru de mases?, ¿cuálu ye'l trucu pa caltenete n'equilibriu y nun cayer?

El centru de mases del nuesu cuerpu pue variar, por casu, dependiendo de la postura que tengamos, pero pa que mos faigamos una idea xeneral, atópase nel interior del banduyu. El trucu pa nun cayer ye caltener el centru de mases na zona del nuesu puntu de sofitu (nesti casu, los pies). Por eso, cuando inclinamos el cuerpu, nel momentu que'l centru de mases sal de la zona de los pies, vamos cayer.

Nel dibuxu d’enriba, na posición (1), col centru de masa sobre la zona de los pies podemos tar tranquilos. Na (2), yá non tanto.

¡Somos equilibristes!

Pa ponenos a prueba como equilibristes podemos trazar una llinia nel suelu con cinta de carroceru o adesiva, tices nel esterior o a cencielles poniendo una cuerda. Vamos intentar caminar sobre la llinia, calteniendo siempres los dos pies sobre ella. ¿Cuéstate un pocu? Ye normal, agora'l puntu de sofitu ye más pequeñu que cuando tenemos los dos pies separatos. Si yá consiguisti, puedes intentar facelo más difícil inda, por casu, faciendo'l circuitu al pizopé o poniendo un oxetu, como un llibru, sobre la cabeza.

¿Queréis cuntanos daqué?

Prestaríanos pola vida poder acompañar les vueses esperiencies, anque seya dende la distancia. Por eso, vamos establecer una vía de diálogu de forma virtual. ¿Cómo lo fadremos?

  • Podéis unvianos les vueses duldes, suxerencies, esperiencies, etc. colos y coles guah.es al corréu lletrónicu, poniendo nel asuntu del corréu  “Unipeques en casa”.
  • Podéis siguinos nes redes sociales de la Universidá d'Uviéu, onde vamos dir espublizando les novedaes d’esta páxina. Amás, si compartís les vueses esperiencies en redes sociales, podéis mentanos y utilizar el hashtag #unipequesencasa y #universidadparapeques #universidapaguahes.
  • Al traviés de la nuesa canal de telegram y en Instagram tamién podéis siguinos y tar al día de les nueves espublizaciones.

 

La Universidá pa guah.es / Universidad para peques / Children's University ye un proyectu de la Universidá d'Uviéu, que cunta cola collaboración de la Fundación Española pa la Ciencia y la Tecnoloxía - Ministeriu de Ciencia, Innovación y Universidaes, Caxa Rural d'Asturies, Bancu Santander, Grupo Hunosa, Conceyu de Siero, APADAC, Pridental, Cluster TIC Asturies, DXC Technology, Lacera ya ITVasa.

 

Enlaces rápidos