Inicio » Peques en casa

Peques en casa

Indiacas

10/07/2020

Vamos crear una indiaca y, xugando con ella, vamos poder afayar munches coses sobro'l vuelu y la cayida d'oxetos

Como vimos va unos díes, hai munchos inventos voladores que podemos atopar al nuesu alredor. Güei proponémosvos crear unu que ta rellacionáu col deporte, porque… ¿sabíais que la ciencia y el deporte tán bien xuníos?

¡Güei vamos crear una indiaca!

Una indiaca ye un oxetu volador que s'utiliza nun deporte bien popular en Brasil (que tamién se llama indiaca). A esti tipu de pelotes llamámosles volantes y son paecíes a los del bádminton. Esisten distintos tipos de indiacas, pero toes tienen una base con forma de pelota esplanada, que ye la que se golpea pa facela volar, y delles plumes sobresaliendo na parte cimera, que ayúdenles a volar y dirixise.

Xugando con ella podemos afayar munches coses sobro cómo vuelen y cayen los oxetos ¿Anímeste?

Pos, ¡entamemos!

Materiales

  • Folios
  • Papel d’aluminiu
  • Cinta aislante
  • Cuadraos o círculos de tela, d'unos 15 o 20 cm
  • Brides (opcional)
  • Goma eva, papeles de colores, plumes…

Observaciones

Ye posible que los y les peques enxamás utilizaren o vieren una brida. Nesi casu, pueden precisar un pizcu d'ayuda o indicaciones pa engabitar. Realmente, ye un material que puede resulta-yos bien interesante y preséu pa faer tou tipu de construcciones, suel-yos gustar enforma.

Si nun tenemos brides, podemos emplegar otru material pa suxetar, como cinta aislante o una cuerdo bien atada.

Los y les más peques más peques probablemente van precisar ayuda pa cortar la tela.

Afayamos

¿Dalguna vegada preguntasti cómo cayen los oxetos?, ¿qué fai que cayan más rápidu o adulces al suelu?, ¿la masa?, ¿la forma del oxetu?

Proponémoste un senciellu esperimentu p'afayalo:

  • Coyemos dos folios iguales (mesma masa, mesma forma, mesmu tamañu), unu en cada mano. Si los tiramos al suelu dende'l mesmu altor, ¿cuál va llegar antes al suelu?
  • Engurriamos unu de los folios faciendo una pelota con él (mesma masa, forma distinta). Tenemos una pelota de papel nuna mano y un foliu ensin engurriar na otra. Si lu tiramos dende'l mesmu altor, ¿cuál va llegar antes al suelu?
  • Agora facemos otra pelota col foliu que nos quedaba, pero esta vegada metemos nel so interior dalgún oxetu pequeno y pesao (tuerques, plastilina, etc). Intentamos que tenga la mesma forma y tamañu que la otra pelota, pero va pesar más. Si los tiramos al suelu dende'l mesmu altor, ¿cuál va llegar antes al suelu?

¿Inflúi'l pesu na velocidá de cayida?, ¿y la forma del oxetu?

¿Qué frena a la fueya de papel ensin engurriar?

¡Manes a la ciencia!

Agora que yá esperimentemos colos oxetos en cayida llibre, ¿qué tal si construyimos una indiaca que caya una y otra vez pudiendo xugar con ella?

Pa ello, vamos siguir los siguientes pasos:

  • Primero vamos construyir la base de nuesa indiaca, pa lo que vamos precisar los folios. Engurriamos los dos creando una pelota colos mesmos.
  • Pa consiguir qu'estos folios nun se muevan, envolubrar en papel d'aluminiu, faciendo una pelota. Esto va ser la base de la indiaca.
  • Agora vamos facer la parte que va ayudar a nuesa indiaca a volar, les plumes”. Podemos emplegar distintos materiales:  goma eva, papeles de colores, plumes… lo que quedramos. Podemos recortales, faciendo formes con elles, como más nos preste. Lo importante nesta parte ye faeles abondo llargues, pa que puedan sobresalir cuando les cubramos cola tela.
  • Pegamos un pizcu les plumes” que creemos sobro la base de la indiaca, utilizando cinta aislante o cinta de carroceru. Esto va ayudanos a asitiar y cerrar dempués la tela con mayor seguridá.
  • A lo último, sofitamos la tela sobro la mesa y vamos asitiar nel centru la base de la indiaca coles plumes” escontra riba. Vamos envolubrar la base y vamos cerrar y apertar fuerte con una brida. Si nun tenemos brida, podemos emplegar cinta de pegar o una cuerda.

¡Yá tenemos llistu'l nuesu oxetu volador! Podemos xugar y comprobar les sos distintes maneres de volar. Si llanzamosla en dirección vertical escontra'l cielu ¿como va cayer? Y si la tiramos palantre, ¿sigue una llínea recta?

La forma tradicional de xugar cola indiaca ye, ente mínimu, dos persones, asitiaes una enfrente de la otra. Vamos poner la mano plana y golpeamos la indiaca escontra alantre y escontra riba, creando una parábola.  La persona d'enfrente tendrá d'intentar devolvénosla, dándo-y de la mesma manera, ensin que caya al suelu ¿Cuántos golpes podemos da-y ensin que caya? ¿Y si en cuenta d’utilizar les manos dámos-y con otres partes del cuerpu?

Pa siguir esperimentando

Podemos facer tantes indiacas como quedramos. Pero ¿qué va pasar si les partes que sobresalen camuden? ¿Vuela más o menos?

D'esta mesma manera podemos dir probando distintes maneres como camudar el pesu que tien na base. Si na nuesa primera indiaca punximos 2 folios, ¿qué va pasar si ponemos 3? ¿o 4? ¿va volar más?

Si atamos una cuerda al estremu onde punximos la brida, ¡¡vamos convertir la nuesa indiaca nuna carioca!! Podemos xugar con ella y facela baillar faciendo movimientos circulares, onde tendremos de caltener l'equilibriu ¿Va actuar la fuerza centrífugo al soltalo dempués de dar vueltes? Si quies saber un pocu más sobre esto, mira esta propuesta.

Pa saber más

Nun vos lo cuntemos, pero, cuando tuvimos tirando les pelotes de papel con distintu pesu, fiximos un esperimentu bien famosu sobre cayida llibre escurríu por Galiléu Galilei fai más de 400 años. Galiléu foi un científicu bien famosu que, ente otres coses, pasó parte de la so vida investigando alrodiu de ¡les ramples! (o como les llamen los científicos y científiques, planu inclináu). Galiléu esperimentaba con elles y afitábase en cómo cayíen los oxetos. Asina afayó que ¡¡la masa nun inflúi na velocidá de cayida llibre!! Por eso, nel nuesu esperimentu, cuando tiramos dos pelotes de papel d'igual tamañu, pero una más pesada que la otra, llegaben al suelu al empar.

Equí na Tierra, cola nuesa atmósfera, tol aire que nos arrodia fai frenar los oxetos y condicionar enforma a la de volar y cayer. Ese ye'l motivu pol que, cuando tiramos una fueya de papel ensin engurriar, tarda más tiempu en llegar al suelu.

Pero…¿y si fixéramos l'esperimentu na lluna, onde nun hai atmósfera nin aire que pueda interferir? ¿Cayeríen al empar, por casu, una pluma y un martiellu? ¿Apetezte comprobátelo? Pos mira esti vídeu nel que l'astronauta David Scott, comandante del Apolo XV, compruébalo.

¿Queréis cuntanos daqué?

Encantaríanos poder acompañar les vueses esperiencies, anque sía dende la distancia. Por eso, vamos establecer una vía de diálogu de forma virtual. ¿Cómo lo fadremos?

  • Podéis unvianos les vueses duldes, suxerencies, esperiencies, etc. colos y les peques al corréu electrónicu, poniendo nel asuntu del email  “Unipeques en casa”.
  • Podéis siguinos nes redes sociales de la Universidá d'Uviéu, onde vamos dir espublizando les novedaes d'esta páxina. Amás, si compartís les vueses esperiencies en redes sociales, podéis mentanos (universidá_pa_peques n’Instagram)  ya emplegar el hashtag universidápapeques.
  • Tamién podéis siguinos al traviés del nuesu canal de telegram y en Instagram, pa tar al día de les nueves publicaciones

 

Artículo traducido por Elena González Menéndez.

La Universidad para peques/ Universidá pa guah.es / Children's University es un proyecto de la Universidad de Oviedo, que cuenta con la colaboración de la Fundación Española para la Ciencia y la Tecnología - Ministerio de Ciencia, Innovación y Universidades, Caja Rural de Asturias, Banco Santander, Grupo Hunosa, Ayuntamiento de Siero, APADAC, Pridental, Cluster TIC Asturias, DXC Technology, Lacera e ITVasa.

 

Enlaces rápidos