Inicio » Peques en casa

Peques en casa

Llaberintos reciclaos

28/07/2020

Vamos llaberintos divertíos pa los banzones aprovechando materiales reciclables

Güei proponémoste facer física ya inxeniería, ¡xugando con banzones! Vamos amosarte cómo facer senciellos y risonderos circuitos de banzones aprovechando materiales reciclables y con ayuda de la nuesa amiga, la gravedá.

Materiales

Pal circuitu na paré:

  • Banzones, pompones o pelotines pequeñes
  • Rollos de papel hixénico/papel de cocina
  • Tisories
  • Cinta de carroceru o adesiva
  • Banzones
  • Recipiente sobre’l que va cayer el banzón, como un platu vieyu o una caxa.
  • Tayuelu

Pal pinball o circuitu na caxa:

  • Banzón
  • Caxa de zapatos, lo mayor que seya posible
  • Material reciclable: rollos de papel hixénico, güeveres, cartón, caxines de cartón (por casu de conserves), tapones, chapes, etc. Lo qu’atopes y discurras.
  • Pistola de silicona o, nel so defectu cinta de pegar fuerte
  • Tisories
  • Material pa decoración: ceres, témperes, rotuladores

Preparativos

  • Pa facer el circuitu, tenemos de buscar un requexu de la casa, como una paré, que s'atope llibre d'oxetos y sobre la que tengamos manexabilidá abondo pa poder movenos y pegar los elementos del circuitu.
  • Vamos dexar tolos materiales al algame de los y les guah.es.

Pa guah.es bien guah.es

Tenemos de tener curiáu colos banzones y recordar que nun tenemos de llevales a la boca.

Amás, quiciabes queramos utilizar un tayuelu pa poder facer el circuitu más altu.

Pa la realización del circuitu na caxa de cartón ye posible que precisen un pocu d'ayuda pa pegar los oxetos, sobremanera si utilizamos la pistola de silicona.

¡Manes a la ciencia!

Circuitu na paré:

Pa realizar el circuitu de banzones, vamos entamar pegando un rollu de papel na paré con cinta de pegar o de carroceru ¿Va cayer al suelu si lu ponemo n’horizontal? Y si lu ponemos de forma vertical dafechu, ¿va rodar pel interior del rollu? Tenemos d’atopar un puntu entemediu nel que podamos dirixir el nuesu banzón ¡Recuerda! Cuántu más inclináu tea'l rollu, más velocidá va garrar el banzón.

Tres ello, podemos dir poniendo más rollos, alloñalos unos d'otros aprovechando la velocidá del banzón, camudar el sentíu del circuitu, ensertar unos rollos n'otros Tolo que discurramos!

Pinball caseru

Nuna caxa de zapatos o de cartón, pegamos distintes torgues feches con material reciclable: túneles con rollos de papel hixénico o caxines, camininos serpentiantes o ramples de cartón, rebotadores con distintos tapones, ¡Tolo que discurras!

Vamos marcar un llugar de salida y otru de meta y vamos intentar que’l nuesu banzón llegue lo primero posible a la meta moviendo ya inclinando la caxa, pero, recuerda, nun  val garrar el banzón cola mano.

Podemos cronometranos y xugar cola nuesa familia a ver quién ye'l más rápidu. Tamién podemos xugar ente dos persones, garrando caún o caúna, la caxa por un estremu y coordinándonos en mover el banzón.

Por ciertu, garrar el banzón cola mano ye trampa.

Pa saber más

Quiciabes pudieres decatate de que, dependiendo de la superficie per onde pase'l banzón, ésta va dir más o menos rápido. O si en llugar de tirar un banzón, refundiamos una bola de papel o otru material, va dir más adulces. Esto ye porque esiste una fuercia llamada fuercia d’esfregadura que fai frenar los oxetos en movimientu. Ello ye que si tuviéremos nel vacíu y nun esistiera esta fuercia, ¡los oxetos nun pararíen nunca!

Per otra parte, a lo llargo de tola propuesta tuvimos trabayando con una máquina simple: un planu inclináu. Quiciabes teas pensando que nun se paez enforma a una máquina, pero si te fixes, fai que precisemos utilizar muncha menos fuercia a la de mover un oxetu, tanto si tires dende enriba como si lo xubimos dende la parte baxa. Esto facilítanos enforma'l trabayu y ye daqué que yá sabíen los nuesos antepasaos, por casu, ¿sabíes que los romanos utilizaben nos sos acueductos pa tresportar agua? ¿o los exipcios na construcción de les pirámides?

¿Queréis cuntanos daqué?

Prestaríanos pola vida poder acompañar les vueses esperiencies, anque seya dende la distancia. Por eso, vamos establecer una vía de diálogu de forma virtual. ¿Cómo lo fadremos?

  • Podéis unvianos les vueses duldes, suxerencies, esperiencies, etc. colos y coles guah.es al corréu lletrónicu, poniendo nel asuntu del corréu  “Unipeques en casa”.
  • Podéis siguinos nes redes sociales de la Universidá d'Uviéu, onde vamos dir espublizando les novedaes d’esta páxina. Amás, si compartís les vueses esperiencies en redes sociales, podéis mentanos y utilizar el hashtag #unipequesencasa y #universidadparapeques #universidapaguahes.
  • Al traviés de la nuesa canal de telegram y en Instagram tamién podéis siguinos y tar al día de les nueves espublizaciones.

 

La Universidá pa guah.es / Universidad para peques / Children's University ye un proyectu de la Universidá d'Uviéu, que cunta cola collaboración de la Fundación Española pa la Ciencia y la Tecnoloxía - Ministeriu de Ciencia, Innovación y Universidaes, Caxa Rural d'Asturies, Bancu Santander, Grupo Hunosa, Conceyu de Siero, APADAC, Pridental, Cluster TIC Asturies, DXC Technology, Lacera ya ITVasa.

 

 

Enlaces rápidos