Universidad para peques

Qué risondero ye xugar cola pintura, facer les nueses creaciones con ella, pintar sobro dinstintos materiales… Y si amás, ta moviéndose ¡muncho más! Pero, ¿cómo podremos facer que la pintura se mueva?

Al nuesu alredor esiten fuercies que faen que los oxetos se muevan. Delles puen vese con facilidá, como cuando emburriamos daqué cola mano. Otres, sicasí, son más misterioses, escuéndense un poco ente los nuesos güeyos y paecen confundinos.

Nesta propuesta vamos esperimentar con estremaos tipos de fuercies, pero sobro too cola fuercia centríguo, que fadrá movese la pintura escontra l’esterior ensin que nosotros y nosotres emburriémosla direutamente. Pa ello, pasaremos un ratu convirtiéndonos en físicos y físiques y fadremos unes creaciones molones que podremos emplegar pa decorar la casa. Vamos entamar a preparalo too pa facer munches creaciones.

¡Vamos allá!

Materiales

• Recurridor de llechugues (llechuguera)
• Temperes de distintos colres
• Fueyes, cartulines…
• Tisories

Observaciones

Pa esta propuesta sedrá necesaria una llechuguera. Anque vaya a enllordiase de témpera durante l’actividá, se llimpia bien fácil. Con agua y xabón va quedar como nueva, pudiendo volver a reutilizala pal so usu orixinal ensin nengún problema.

Con esta actividá pue enllordiase un pizcu, asina que podemos buscar un llugar adecuáu pa facelo. La mesa la cocina, por exemplu, pue convertise nel nuesu llaboratoriu. Podemos emplegar mandiles, delantales o ropa vieya pa poder esperimentar y xugar con llibertá ensin miéu a enllordianos la ropa.

Les creaciones resultantes puen tener pintura abondo. Sedría bona idea reutilizar fueyes, cartones o lo que tengas a mano, pa dexar ensugar les nueses obres ensin que s’empuerque nengún mueble.

Preparativos

• Asitiamos los materiales nel nuesu llugar de casa pa esperimentos.
• Buscamos un sitiu cerca onde podamos dexar les nuestres creaciones ensugando cuando finemos de faceles.
• Recortamos el papel que vamos emplegar de mou qu’entre dientro del nuesu recurridor de llechugues.
• Tenemos a mano les nueses pintures y…

¡Manes a la ciencia!

Yá tenemos tolo que necesitamos al nuesu algame, asina que disponémonos a entamar la nuesa creación.

Ponemos dientro de la llechuguera la nuesa fueya recortada y echamos un chorrín de témpera del color que queramos, faciendo un “garabatu” con él.

Cerramos la llechuguera y damos-y vueltes con fuercia ¿Qué ta pasando? Pues abrir la llechuguera y comprobalo por ti mesmu.

Depués, pues dir echando pequeños chorros de témpera d’otros colores ¿Entemeceránse na llechuguera? ¿qué formes faen? ¿escontra onde se dirixen?

¿Qué ta pasando?

Cuando xiramos la llechuguera tamos faciendo un movimientu circular que fai qu’actúe una fuercia sobro la pintura. Esta fuercia, centrífugo, tiende a desplazar a los oxetos escontra l’esterior, en sentíu contrariu al centru.

Esisten munchas situaciones y oxetos cotidianos onde podemos reparar esta fuercia. Quiciabes, dalguna vegada, diendo en bici o en coche, al coyer una curva demasiáo rápido, sentisti qu’había una fuercia que t’emburriaba escontra l’esterior de la curva. La fuercia centrífugo taba actuando sobro’l to propiu cuerpo. Si enxamás lo percibieras xuega a esti xuegu: coye les dos manes de otra persona y, colos pies xuntos, echa’l cuerpu p’atrás y entamar a dar vueltes.

Pa siguir esperimentando

Depués de probar coles témperes, pues probar con otru tipu de pintura como puen ser les acuareles llíquides. Facemos el mismu procedimientu qu’enantes y al abrir ¿qué pasó? ¿quedó igual?

Agora podemos probar con distintos tipos de papel. Enantes foi con una fueya ¿Y si agora facemoslo con un papel de filtru o de cocina? ¿socederá lo mesmo?

Observaremos una absorción diferente dependiendo del papel qu’empleguemos. El papel de cocina ye más absorbente qu’una fueya, al igual que si vamos xugando con diferentes pintures que tengamos per casa.

¿Cuántes combinaciones diferentes podemos facer? ¿Queden toes distintes?

Depués de probar con munchos materiales y tipos de papel, podemos introducir dalgún oxetu nel so interior, como por exemplu una canica. Al da-y muncha enerxía a la nuesa llechuguera la canica fadrá una versión distinta de la nuesa creación.

Por otru llau, si nos apetez siguir esperimentando cola fuercia centrífugo hai munchos otros esperimentos que puen prestanos. Prueba a meter un poco d’agua nuna botella de plásticu, átala con una cuerda y faela xirar ¿Escontra onde va l’agua? ¿Si quitamos el tapón caerase?

¿Qué faen los científicos y les científiques?

La ciencia que principalmente estudia les fuercies ye la física, en concretu la mecánica clásica.

Un físicu que camudó darréu la nuesa conceición sobro les fuerces foi Isaac Newton. Newton tuvo contribuciones en física, matemátiques, óptica...cerró la llamada revolución científica, que sienta les bases de la ciencia tal que la conocemos anguaño (casi nada). Si quies saber un pocu más sobro la so vida, pincha equí. 

Newton definió les fuercies matemáticamente y ellaboró les famosísimas lleis del movimientu que consiguen esplicar tantu'l movimientu de los astros, como'l de les máquines o'l de cualquier oxetu, sentando los cimientos de la mecánica clásica. Si quies saber un pocoñín sobro estes lleis, mira esti vídeu. 

A día de güei los físicos y les físiques siguen investigando y plantegándose problemes coles fuercies, el movimientu, l'aceleración…¿y sabes? Cuando nosotros y nosotres esperimentamos con too esto tamién tamos faciendo física. Ye chula, ¿verdá?

¿Queréis cuntanos daqué?

Prestaríanos poder acompañar les vueses esperiencies, anque sía dende la distancia. Por eso, estableceremos una vía de diálogu de forma virtual ¿Cómo lo fadremos?

• Podéis unvianos les vueses duldes, suxerencies, esperiencies, etc. colos y les peques al corréu electrónicu, escribiendo nel asuntu del email “Unipeques en casa”.
• Podéis siguinos nes redes sociales de la Universidá d’Uviéu, onde diremos publicando les novedaes d’esta páxina. Amás, si compartís les vueses esperiencies nes redes sociales, podéis mencionanos y emplegar el hashtag #unipequeencasa y #universidadparapeques.
• Al traviés del nuesu canal de telegram y en Instagram podéis tar al día de les nueves publicaciones.

Artículo traducido por María Iglesias Orviz

La Universidad para peques/ Universidá pa guah.es / Children's University es un proyecto de la Universidad de Oviedo, que cuenta con la colaboración de la Fundación Española para la Ciencia y la Tecnología - Ministerio de Ciencia, Innovación y Universidades, Caja Rural de Asturias, Banco Santander, Grupo Hunosa, Ayuntamiento de Siero, APADAC, Pridental, Cluster TIC Asturias, DXC Technology, Lacera e ITVasa.