Inicio » Peques en casa

Peques en casa

Pintura Esponxoso

28/07/2020

Vamos convertinos en químicos y químiques y vamos dar otra dimensión a los nuesos dibuxos

La combinación de CIENCIA y ARTE siempres ye maraviyosa, por eso güei proponemos facelo d'una manera un pocu especial. vamos convertinos en químicos y químiques pa dar otra dimensión a los dibuxos que solemos faer: ¡vamos facer en 3D! Con materiales que vamos atopar en casa vamos poder esperimentar y crear dibuxos bien molones.

Materiales

  • 1 taza de farina
  • 1 cuyarada sal
  • 2 cuyaraes de formientu químico (polvu pa enfornar)
  • Agua
  • Una escudiella pa entemecer
  • Cartulina o cartón
  • Colorante alimenticiu o acuareles llíquides (opcional)
  • Botes de mueyos, pa poder echar y usar la pintura (opcional)
  • Microondes

Preparativos

Buscamos un espaciu en casa pa instalar el nuesu llaboratoriu. Con esta actividá vamos enllordiar una migaya, y amás vamos precisar utilizar el microondes, asina que probablemente la mesa de la cocina seya'l meyor sitiu.

Tenemos que retayar les cartulines al tamañu que tenga la bandexa del nuesu microondes, pa que la nuesa creación pueda xirar dientro ensin probelmas cuando lu tengamos qu'utilizar.

¡Manes a la ciencia!

Preparamos la pintura:

  • Nuna escudiella grande echamos 1 taza de farina, 1 cuyarada de sal y les dos cuyaraes de formientu. Revolvemos.
  • Añadimos agua adulces hasta que consigamos una masa ensin grumos.
  • Dixebramos la masa en distintes escudielles p’añadir el colorante alimentario. Podemos añadir colorante hasta que consigamos el color deseáu.
  • Enllenamos los botes de mueyos cola pintura y… ¡manes a la obra!

Si nun tenemos botes de mueyos, podemos a cencielles usar una cuyar pequeñina y dir echando pocoñín a pocu la nuesa pintura. Otra opción pue ser utilizar una manga pastelera o una bolsina de plásticu. Echamos nella l’amiestu, zarramos y facemos un furacu pequeñín nuna de les puntes. Al apertar la bolsa, la pintura va salir pellí. 

¡Entamemos a crear!

Agora que yá tenemos les nueses pintures llistes, podemos entamar a crear con elles. Namás tenemos que garrar una cartulina, un bote pintura y dexar volar la nuesa imaxinación.

Una vegada que la nuesa creación ta llista (y cola ayuda d'una persona adulta) tenemos que metela unos 30 segundos nel microondes. El tiempu ye averáu, depende de la cantidá de pintura qu'echares y de la potencia del to microondes. Ye importante que teamos bien sollertes a lo qu'asocede dientro del microondes, porque si lo dexamos demasiáu tiempu pue quemar un mizcu'l papel. 

¿Qué-y pasó a la nuesa pintura? ¡Eso ye, creció!

¿Qué ta pasando?

En toles pintures podemos atopar muncha ciencia y nesta n'especial muncha más: fiximos ¡una reacción química! 

El formientu químico ta formao por dos ingredientes principales, un ácidu y una base. Amás, lleva otros ingredientes que faen que pueda caltenese nel so envase, ensin que los ingredientes principales reaccionen ente sí primero que los usemos. Cuando facemos la nuesa pintura, entemecemos el formientu químico col agua y col restu d'ingredientes y métemoslo nel microondes, produzse una reacción química: l'ácidu reacciona cola base, y xenérense burbuyines de dióxidu de carbonu a esgaya.

Estes burbuyes, al intentar “fuxir” de la pintura, faen que la pintura engorde y creza, ¡como cuando faemos un bizcuechu!. D'esta manera, consiguimos que la pintura plano” que teníamos nel nuesu papel, pase a ser pintura 3D y ¡esponxoso!

Pa siguir esperimentando

Facer les nueses mesmes creaciones préstanos pola vida, polo que con estes creaciones puedes facer una postal pa regála-yla a daquién cuando acabe esti tiempu en casa, o un cuadru…

Tamién ye interesante esperimentar cola mesma receta de la pintura: podemos probar qué pasa si-y ponemos más o menos formientu, si nun-y ponemos formientu, si ponemos más farina, les ¡toles combinaciones que podamos discurrir!

¿Queréis cuntanos daqué?

Prestaríanos pola vida poder acompañar les vueses esperiencies, anque seya dende la distancia. Por eso, vamos establecer una vía de diálogu de forma virtual. ¿Cómo lo fadremos?

  • Podéis unvianos les vueses duldes, suxerencies, esperiencies, etc. colos y coles guah.es al corréu lletrónicu, poniendo nel asuntu del corréu  “Unipeques en casa”.
  • Podéis siguinos nes redes sociales de la Universidá d'Uviéu, onde vamos dir espublizando les novedaes d’esta páxina. Amás, si compartís les vueses esperiencies en redes sociales, podéis mentanos y utilizar el hashtag #unipequesencasa y #universidadparapeques #universidapaguahes.
  • Al traviés de la nuesa canal de telegram y en Instagram tamién podéis siguinos y tar al día de les nueves espublizaciones.

 

La Universidá pa guah.es / Universidad para peques / Children's University ye un proyectu de la Universidá d'Uviéu, que cunta cola collaboración de la Fundación Española pa la Ciencia y la Tecnoloxía - Ministeriu de Ciencia, Innovación y Universidaes, Caxa Rural d'Asturies, Bancu Santander, Grupo Hunosa, Conceyu de Siero, APADAC, Pridental, Cluster TIC Asturies, DXC Technology, Lacera ya ITVasa.

 

 

Enlaces rápidos