Inicio » Peques en casa

Peques en casa

Robot coordináu

10/07/2020

Vamos construyir un robot de plastilina emplegando sistemes de coordenaes y l'azar de los dados

Bit, bit, bit, soi un robot construyíu gracies a los mates y a vosotros y vosotres. Bit, bit,bit... na mio construcción camentamos computacionalmente. Bit, bit, bit...les mios pieces fueron atopaes gracies a un sistema de coordenaes, bit, bit, bit....y escoyíes aleatoriamente…

Pero… ¿y esti robot tan raru y risonderu que diz que foi construyíu gracies a los mates?¿Qué nos ta proponiendo?

Güei vamos pasanoslo xenial construyendo'l nuesu robot d'una forma bien especial. Vamos xugar colos dados y con un sistema de cuadrícules, nel que cada posición o coordenada va contener les pieces del robot. Pasu a pasu, l'azar va indicanos les pieces que queremos pone-y, faciendo que cada robot sía únicu nel mundu.

Bit, bit, bit... ¡Entamemos!

Materiales

  • Papel grande, pa dibuxar un tableru
  • Dos daos
  • Pegatinas o papel y celu
  • Plastilina
  • Distintos elementos de construcción: clips, tuerques, torniellos, arandeles, limpiapipas, trocitos de cables, pieces de legu, cuerda, tapones, oxitos, etc. Lo que tengamos disponible per casa y paézanos interesante.

Observaciones

Esta propuesta pue ser bien prestada si'l xuegu ye compartíu ente tola familia o grupos de dos o más peques, collaborando na construcción del robot.

La primer vegada que xuguemos, munchos y munches neñes, probablemente, precisen un pocu d'ayuda  a la d'entender cómo buscar les coordenaes.

Preparativos

De primeres, preparamos el tableru. Pa ello, nuna fueya de papel grande, facemos una cuadrícula de 3x4, 4x4, 6x6,... dependiendo de la variedá de materiales que vaigamos utilizar pa construyir el robot. Na parte cimera del cuadru, escribimos una lletra sobro les cuadrícules (A, B, C, ...). Nun llateral, na parte vertical, escribimos un númberu (1, 2, 3, 4, ...), de cuenta que cada cuadrícula tenga asignada un solu númberu (horizontal, files) y una única lletra (vertical, columnes).

Sobro la cuadrícula, en cada posición, asitiamos un montonín de cada tipu d'oxetu pa construyir el robot: tuerques, clips, oxitos, arandeles, llimpiapipas, paliyos, ¡lo que nos pruyir y tengamos per casa!

D'últimes preparamos los dados; ún va ser de númberos y otru de lletres. Pa facer el dadu de lletres, a cencielles podemos pegar, con pegatinas, les lletres sobro les sos cares. Nel de númberos, podemos tapar los que nun teamos utilizando na cuadrícula tamién con una pegatina, y convertir eses cares en comodinos. Cuando nos salga un comodín, vamos poder escoyer el númberu que más nos interese.

En resume, sobro una mesa o cualesquier otru llugar onde nos sintamos a gustu pa xugar, vamos asitiar el tableru que va tener distintos materiales sobro cada cuadrícula, los dados, una bola plastilina y…¡a construyir!

¡Manes a la ciencia!

Construyir un robot ye bien cenciellu porque…¡lo daos van dicinos cómo facelo! Primero vamos llanzar unu, por casu, el que tien númberos ¿Qué casilles correspuenden a esi númberu? Son delles, podríen tocanos 4 distintes, asina que vamos tirar el dadu de les lletres… ¡Solo hai una casilla que correspuende a la lletra y al númberu que nos tocó!

Vamos coyer una o delles pieces de la casilla que nos correspuende y vamos poner na nuesa bola de plastilina. Podemos dexales asitiaes onde nos apeteza o usales pa facer marques na plastilina, lo que más nos apeteza. Si cayemos nuna casilla na que yá nun queden pieces, volvemos repitir la tirada.

¿Cuándo termina'l xuegu? Cuando'l nuesu robot encántenos o cuando yá nun nos queden más pieces pa añedir.

D'esta forma, cada robot va ser fechu distintu y únicu, nun va haber dos hermanos.

Pa siguir faciendo

Podemos facer tantos robots como nos apeteza, caún va ser distintu. Tamién podemos camudar la forma de la plastilina, dependiendo de si queremos que sía un robot redondu, cuadráu, triangular, … o inclusive pue tener distintes partes.

Una vegada construyéramos el robot coles nueses families, podemos intentar facelo solos o soles, porque ¡Yá sabemos buscar les coordenaes (cuadrícules)!

¿Y si en cuenta de un robot facemos otra cosa? Una bisarma, un o una científica, una ma o un pá,...¡cuántes coses podemos imaxinar! Pa ello, a cencielles camuda la forma de la plastilina a lo que creas que más s'afai a la to idea, según los oxetos que tenemos sobro'l tableru ¡puen salinos personaxes tan distintos!

Pa saber más

Anque quiciabes nun nos deamos cuenta, nesta propuesta tenemos muchíííísimes mates. Per un sitiu, colos dados xugamos al azar, l’aleatoriedá, onde cualesquier resultancia nun ye previsible, anque...si por casu, decidiéremos poner la mesma lletra trés vegaes nel dadu, ¿sería más probable que nos saliere esa lletra?

Tanto l’aleatoriedá como la probabilidá estúdiense dende una rama de les matemátiques llamada estadística.

Per otru llau, tenemos una cuadrícula na que buscar oxetos ¿cómo? Usando un sistema de coordenaes. Cada llugar tien asignaos un númberu y una lletra, y asina, podemos atopar cada puntu. Esti sistema emplégase muncho na nuesa vida, ayudándonos a alcontrar cualquier llugar… ¡del planeta! Cada llugar nel que t’atopes, nun importa si ye la to casa o metanes un enorme desiertu, tien unes coordenaes específiques que podríen ayudate, por casu, a nun perdete o a que te rescataren.

Esti sistema emplegase munchu en matemátiques, en concretu en dos rames llamaes álxebra y xeometría, siendo en realidá, una ponte ente dambes disciplines (xeometría analítica). Pero ye tan chulu que munches otres ciencies como la xeografía o la física utilizalo nos sos respectivos campos.

Y con tantes y tantes mates, ¿sabéis en qu'empecipiemos? ¡Nel pensamientu computacional! Gracies a esti tipu de pensamientu descomponemos un problema y procesamos los datos, una habilidá propia de la computación y el pensamientu críticu ¡Casi nada!

¿Qué faen los científicos y les científiques?

Per una parte, atopamosnos cola estadística. Esti oficiu científicu tien bien d’implicaciones, yá qu’analiza cualquier tipu de datu...dende los que tengan que ver col tiempu y el clima, los xuegos d'azar, cómo se porta la población… ¡bien de coses!

Una estadística famosa foi Florence Nightingale.

Florence, qu'amás yera enfermera, entendía que cualquier investigación tenía de basase en datos y que estos debíen de ser anotaos, rexistraos y sistematizaos. Esta concepción, fasta entós refugada, permanez vixente hasta güei. Con ello, consiguió amenorgar la tasa de les epidemies y de la mortalidá del 43% al 2% nos hospitales militares británicos. Entá anguaño, los sos estudios estadísticos son utilizaos pa ellaborar diagnósticos médicos.

Si quies saber más d'ella, mira esti vídeu nel que Los Lunnis y Lucrecia cántennos un xenial cantar sobro la so vida ¡ye súper pegaiza! ¡Nanananiii, Florence Nightingale!

En cuanto al sistema de coordenaes, nomáu sistema cartesianu ¿sabéis d'ónde surdió? D'otra mente brillosa René Refugues (Refugues-cartesianu, ¿veis la semeyanza?). René foi unu de los mayores filósofos de la hestoria, ye más, considérase-y el padre de la filosofía moderna. Pero non contentu con eso, tamién tuvo magnífiques contribuciones en física y matemátiques, como ye'l casu del sistema cartesianu. Esti sistema, que d'una manera simplificada, déxanos facer esti xuegu ¿y sabéis cómo se-y asocedió? ¡Mirando a una mosca distrayíu!

Descartes tenía que pasar muncho tiempu na cama yá que tenía mala salú. Mirando a una mosca entrugóse si podría determinar la so posición en cada intre, asina que se llevantó, garró un papel y una fueya y dibuxó llínees perpendiculares como les de la nuesa cuadrícula. Asina, acababen de nacer les coordenaes cartesianes y, con ello, la xeometría analítica.

¿Queréis cuntanos daqué?

Encantaríanos poder acompañar les vueses esperiencies, anque sía dende la distancia. Por eso, vamos establecer una vía de diálogu de forma virtual. ¿Cómo lo fadremos?

  • Podéis unvianos les vueses duldes, suxerencies, esperiencies, etc. colos y les peques al corréu electrónicu, poniendo nel asuntu del email  “Unipeques en casa”.
  • Podéis siguinos nes redes sociales de la Universidá d'Uviéu, onde vamos dir espublizando les novedaes d'esta páxina. Amás, si compartís les vueses esperiencies en redes sociales, podéis mentanos (universidá_pa_peques n’Instagram)  ya emplegar el hashtag universidápapeques.
  • Tamién podéis siguinos al traviés del nuesu canal de telegram y en Instagram, pa tar al día de les nueves publicaciones.

 

Artículo traducido por Elena González Menéndez.

La Universidad para peques/ Universidá pa guah.es / Children's University es un proyecto de la Universidad de Oviedo, que cuenta con la colaboración de la Fundación Española para la Ciencia y la Tecnología - Ministerio de Ciencia, Innovación y Universidades, Caja Rural de Asturias, Banco Santander, Grupo Hunosa, Ayuntamiento de Siero, APADAC, Pridental, Cluster TIC Asturias, DXC Technology, Lacera e ITVasa.

 

 

Enlaces rápidos