Inicio » Peques en casa

Peques en casa

Siguiendo rastros

27/07/2020

Vamos convertinos en naturalistes y deprenderemos a identificar rastros

¿Sabes que la naturaleza ta enllena de pistes escondíes que nos dan munchísima información sobro los animales que l’habiten? L’actividá de güei va permitinos decubrir dalgunes d’elles. Vamos convertinos en naturalistes ¡ensin salir de casa!

Los animales, sobro too los salvaxes, suélense mostrar abondo esquivos al ser humanu. Nun se dexen ver con facilidá y ye bien importante que les persones respetemos el so espaciu. Pero, si reparamos con detenimientu’l nuesu rodiu y prestamos atención, podemos atopar infinidá de rastros, pistes que nos cunten munchísimes coses sobro la vida de los animales.

Pa desarrollar esta capacidá detectivesca, lo primero que fadremos sedrá conocer dalgunos d’esos rastros. Les buelgues son lo meyor que podemos observar y reconocer. ¿Qué vos paez si nos adientramos nesti sorprendente mundu? Asina, la próxima vegada que salgamos d’escursión, podemos alcontrar ya indentificar estos magníficos tesoros.

¡Entamemos!

Materiales

  • Goma-eva
  • Cartón
  • Tisories
  • Pegamín
  • Acuareles
  • Pinceles
  • Fueyes, cartulines…

Preparación

Pa peques más peques, les persones adultes tendremos que prepara-yos los sellos (los y les peques mayores puen intentar facelo por sí mesmos). Pa ello:

  • Dibuxaremos les guelgues na goma-eva. En xeneral, son formes bien cencielles y nun tendría que resultanos mui difícil dibuxales. Na guía de guelgues que preparamos podéis atopar dalgunes de les guelgues más reconocibles.
  • Recortaremos el contornu de la guelga.
  • Per otru llau cortaremos un trozu de cartón, d’un tamañu dalgo mayor al de les guelgues.
  • Pegaremos les guelgues sobro’l cartón

Preparamos una plantiya pa guía de guelgues que podéis emplegar si vos apetez; Podéis descargala equí pa imprimila.

Preparemos los materiales (sellos, acuareles, pinceles, agua, papel, etc.) creando una guapa provocación qu’invite a xugar.

Descrubimos

¿Quies saber tolos secretos que nos puen cuntar les guelgues y otros rastros d’animales? Ye increíble la cantidá de pistes que nos puen dexar y tolo que podemos averiguar abriendo bien los güeyos y llevando la nuesa imaxinación a la naturaleza.

Dexámosvos dos enllaces onde biólogues y biólogos descífrennos dalgunos d’estos secretos: esti y esti.

¡Manes a la ciencia!

A cencielles tenemos que coyer los nuesos sellos y trescalar la goma-eva con acuarela del color que queramos. Pa ello, vamos dir “pintando” la goma-eva cola ayuda d'un pincel fasta que quede bien amugada. 

Cuando tean llistos, estampámoslos sobro la superficie que queramos emplegar. Podemos facer una creación artística, un caminín de buelgues sobro una tira llarga de cartón o papel, imaxinando que l'animal pasó perhí, o cualesquier otra cosa que vos asoceda.

¿Y les nueses propies guelgues?

Nosotros tamién dexamos les nueses propies guelgues y rastros. Pues intentar facer un sellu de la to mano o del to pie o, a cencielles, moyar el dedu n’acuarela y dexar marcaes les tos guelgues dactilares.

Guía de guelgues

¿Qué vos paez crear una guía de guelgues que vos ayude a indentificar rastros? Nesti enllace podéis descargar una plantiya que podemos emplegar pa ello. Anque tamién podemos diseñar y crear la nuesa propia guía, ¡claro! Otra opción pue ser estampales nel nuesu diariu STEAM.

Pa siguir esperimentando

Les guelgues dalgunes miniatures d’animales son bien realistes, y puen servinos p’ampliar la esperiencia. Suxerimos poner enriba guelgues de la mesa, xunto col restu de materiales, varies bolines de plastilina y los animales de xuguete, caminando sobro elles.

Hai munchísimes otres formes de facer sellos bien guapos: con frutes, con materiales recicables, etc. Equí dexámosvos un exemplu: facer sellos con rollos de papel hixiénicu. A cencielles tenemos que cortar, faciendo les formes que queramos, unu de los estremos del rollu. Depués les moyamos en témpera, y estampámosles onde más nos apeteza.

Pa saber más

¿Sabíes que podemos atopar muchísimes otres pistes na naturaleza, amás de les guelgues? Agora mostrarémoste dagún de los rastros que más fácilmente podemos atopar:

Escrementos: Sí, anque pueda paecenos gracioso, les caques dannos muncha información. Por casu, les caques de raposu o llobu, son bien fácil d’identificar.

Los raposos y los llobos suelen dexar les sos caques en llugares bien visibles como enriba d’una piedra o en medio d’un Camín. Munches vegaes, faen esto pa marcar el so territoriu.

Podéis ver como estes caques de llobu tán llenes de los animales que zamparon.

Senderos d'animales: La viesca ta enllena de pequeños senderos d'animales. Afítate, sobremanera, si camines barganal d'un ríu, nos pequeños caminos que s’abren ente la yerba o maleza, muncho menos marcaos que los senderos humanos.

Otros rastros bien interesantes son les egagrópiles. Los curuxos, rapazos nocherniegues, devuelven too aquello que nun pudieron dixerir como los güesos o'l pelo del animal, d'esa forma, vamos poder saber qué merendaran. Estos rastros puen adquirise, esterilizados, per internet, ya identificar l'animal inxeríu al traviés d'una carta de güesos.

Estes son solo dalgunes de les infinites pistes y rastros que podemos atopar. Llurigues, pelo, arañazos nos árboles, … a cencielles hai qu'abrir bien lo güeyos cuando podamos salir al esterior.

¿Qué rastros podríemos atopar nesti árbol? Gracies a esti vídeu grabáu pol Equipu d'Investigación del Osu Cantábricu podemos imaxinanos los rastros que pue dexar esti osu al so pasu ¿El restu d'animales que pasen pellí percibenlo? ¿Dexen los sos propios rastros tamién?

¿Qué faen los científicos y les científiques?

Esisten varies rames de la ciencia qu’estudien a los animales nel so rodiu, anque principalemente falamos de la bioloxía y la zooloxía. Pa estes persones, saber identificar los rastros ye perimportante yá que, gracies a tola información que-yos proporciona, puen estudiar meyor a los animales y al escosistema nel que viven. Conocer les poblaciones, alimentación, comportamientu… ye conocer los vecinos de los humanos.

¿Queréis cuntanos daqué?

Prestaríanos poder acompañar les vueses esperiencies, anque sía dende la distancia. Por eso, estableceremos una vía de diálogu de forma virtual ¿Cómo lo fadremos?

  • Podéis unvianos les vueses duldes, suxerencies, esperiencies, etc. colos y les peques al corréu electrónicu, escribiendo nel asuntu del email “Unipeques en casa”. 

  • Podéis siguinos nes redes sociales de la Universidá d’Uviéu, onde diremos publicando les novedaes d’esta páxina. Amás, si compartís les vueses esperiencies nes redes sociales, podéis mencionanos y emplegar el hashtag #unipequeencasa y #universidadparapeques.
  • Al traviés del nuesu canal de telegram y en Instagram podéis tar al día de les nueves publicaciones. 

 

 

Artículo traducido por María Iglesias Orviz

 

La Universidad para peques/ Universidá pa guah.es / Children's University es un proyecto de la Universidad de Oviedo, que cuenta con la colaboración de la Fundación Española para la Ciencia y la Tecnología - Ministerio de Ciencia, Innovación y Universidades, Caja Rural de Asturias, Banco Santander, Grupo Hunosa, Ayuntamiento de Siero, APADAC, Pridental, Cluster TIC Asturias, DXC Technology, Lacera e ITVasa.

 

 

Enlaces rápidos