Inicio » Peques en casa » Asturianu

Peques en casa

Microbios

28/07/2020

Vamos crear el nuesu propiu microbiu, pondrémos-y nome y vamos decidir cómo queremos que seya

Los microbios son unos seres tan diminutos que nun podemos velos nin tocalos. Tán perdayuri: nel aire, nel agua, nel nuesu cuerpu… inclusive en sitios que nin imaxinamos, tan calientes como l'interior d'un volcán o tan fríos como un iceberg del polu norte.  Anque delles vegaes son los responsables de que carezamos, la gran mayoría nun nos afecten o faen que podamos tar hasta más sanos y sanes. Para poder ver estos seres tan diminutos tendríamos d'utilizar un microscopiu bien potente, de los qu'atopamos nos llaboratorios.

Güei proponemos crear, nun tamañu que podamos ver y tocar, el nuesu propiu microbiu con materiales que tengamos en casa. Podemos pone-y nome, xugar con él y decidir cómo queremos que seya.

Materiales

Masa de moldiar casero (podemos utilizar plastilina si nun queremos facer la masa en casa)

  • Farina
  • Sal
  • Agua
  • Aceite
  • Colorante alimenticiu o acuareles llíquides (opcional, namás si queremos da-y distintos colores)

  • Plumes, bastonicinos, pedacinos de cordel o llana, llazos, cachinos de llimpiapipes, teles... y tolos materiales que queráis utilizar pa crear el vuesu microbiu.

Afayamos

Arródiennos millones y millones de microbios en tol mundu. Podemos atopalos na comida, nel aire, na agua… Pero hai un tipu de microbiu un pocu especial que se llama virus qu'en munches ocasiones nun son bonos para les persones.

¿Dalguna vegada vos punxistis malos? ¿Por qué crees qu'esto asocede?

Munchos científicos y científiques dedíquense a la investigación d'estos seres diminutos pa conocer qué faen, cómo funcionen, cómo se mueven pol nuesu cuerpu…

Por eso güei ¡proponémoste crear el to propiu virus!

Masa de moldiar

Pa poder entamar cola creación del nuesu propiu virus, precisamos plastilina, barru, o cualesquier otra masa de moldiar. Esta plastilina podremos crealo en casa con ayuda de les persones adultes.

Pa la creación de nuesa mesma masa, precisamos una taza de midida que puede ser el recipiente d'un yogur o una tacina pequena. Tolos ingredientes vamos xuntalos nuna escudiella grande pa poder remover coles manes.

Pasu a pasu:

  • Nuna escudiella grande, vamos echando tolos ingredientes:
    • 2 taces de farina
    • 1 taza de sal fino
    • Media taza d'agua templao
    • Media taza d'aceite
  • Revolvémoslo too con una cuyar hasta qu'empieza a formase una pastia un pocu duro. Si veis que la masa queda bien duro y seco, podéis dir añadiendo otru poco d'aceite o agua. Si ta demasiáu pegañoso, añadimos un pocoñín de farina.
  • ¡Ye'l momentu de meter les manes y amasar! Amasamos la masa hasta que queda moldiable, blanduxo y nun ta pegañoso.

  • Cuando tengas la masa al to gustu, puedes añadir colorante alimentario llíquido o acuarela llíquido pa da-y un pocu de color.

¡Puedes crear munches mases de distintos colores!

Preparativos

Cuando tengamos la masa llisto, preparamos tolos materiales sobro una bandexa o nuna mesa, creando una guapa provocación que convide a crear.

¡Manes a la obra!

Puedes faer un virus de munchos colores, con pates, con bolines… dexa volar la imaxinación y vas poder crear tolos virus que quieras.

Al crear el to virus tamién puedes pone-y nome, decidir a qué partes del cuerpu ataca, si ye bonu o malu....

Pa siguir esperimentando

Llavamos bien les manes

Tamién podemos observar como estos virus marchen de les manes al llavales, pa ello puedes xugar a un xuegu.

Pon un mizcu d'agua nun recipiente, y añadi un pocu de pimienta negro, perexil, oriéganu… dalguna especia que puedas atopar per casa

Una vegada que tengas llistu'l recipiente, introduz el deu.

¿Asocede daqué?

Agora pon nel deu un mizcu de xabón de fregar los platos, introduz otra vuelta’l deu.

¿Asocede daqué?

Podemos ver la importancia de llavar les manes, como podemos quitar estos diminutos bichinos de les manes.

Agora que yá sabes la importancia que tien llavar les manes, ufiertámoste otru esperimentu.

Tienes de pintate un virus na palma d'una mano y otru nel envés de la otra mano, a la fin del día los virus tienen que desapaecer

Por que llavar les manes nun seya taaaan aburrío, tienes de tar llavándoles el tiempu que dura'l cantar de “cumpleaños feliz”.

¿Queréis cuntanos daqué?

Prestaríanos pola vida poder acompañar les vueses esperiencies, anque seya dende la distancia. Por eso, vamos establecer una vía de diálogu de forma virtual. ¿Cómo lo fadremos?

  • Podéis unvianos les vueses duldes, suxerencies, esperiencies, etc. colos y coles guah.es al corréu lletrónicu, poniendo nel asuntu del corréu  “Unipeques en casa”.
  • Podéis siguinos nes redes sociales de la Universidá d'Uviéu, onde vamos dir espublizando les novedaes d’esta páxina. Amás, si compartís les vueses esperiencies en redes sociales, podéis mentanos y utilizar el hashtag #unipequesencasa y #universidadparapeques #universidapaguahes.
  • Al traviés de la nuesa canal de telegram y en Instagram tamién podéis siguinos y tar al día de les nueves espublizaciones.

 

La Universidá pa guah.es / Universidad para peques / Children's University ye un proyectu de la Universidá d'Uviéu, que cunta cola collaboración de la Fundación Española pa la Ciencia y la Tecnoloxía - Ministeriu de Ciencia, Innovación y Universidaes, Caxa Rural d'Asturies, Bancu Santander, Grupo Hunosa, Conceyu de Siero, APADAC, Pridental, Cluster TIC Asturies, DXC Technology, Lacera ya ITVasa.

 

Enlaces rápidos