Universidá pa guaḥes

Quiciabes, dalguna vegada, pasónos que queremos cuntar un secretu a un collaciu o collacia y nun nos apetez qu’otres persones s’enteren. Notes en clase, en casa… ¿qué asocedería si les garrara quien non debe? ¡Revelaríen los nuesos secretos!

Énte esti problema, dicidimos consultar a la nuesa amiga la ciencia, que nos dio delles idees y, gracies a ella, podremos ellabrorar ¡mensaxes secretos! Y ye que nesto, la ciencia tien muncha esperiencia. Munches persones, a lo llargo de tola hestoria intentaron mandar mensaxes secretos de formes bien distintes: griegos, romanos, espíes ocultos, detectives… se les inxeniaben pa unviar los sos mensaxes ensin que naide que nun quixeran s’enterase. La clave ta en cómo, y una de les meyores maneres ye al traviés de… ¡la tinta invisible!

La química percorrerá cada lletra que desvelemos nestos mensaxes, faciendo que dalgo invisible, de sópitu, apaeza. Asina, solo’l destinatariu podrá ver el nuesu mensaxe y nosotros podremos salvar los nuesos secretos.

¡Entamemos!

Materiales

• Papel blanco, cartulina o papel d’acuarela
• Cera blanca tipu Manley o, nel so defectu, vela blanca
• Acuareles de colores
• Pinceles
• Agua

Observaciones

Quiciabes cuéstenos un poco pintar cola cera blanca ya que, si nun hai muncha lluz, pue ser difícil ver qué ye lo que yá tenemos pintao o dibuxao, perdiendo un pocu’l filo a la hora de facer la creación. Pa evitar esti problema asitiarémonos nun llugar bien illumináu o ayudarémonos d’una llámpara.

En casu de nun tener cera blanca, podemos emplegar la cera d’una vela y escribir o dibuxar con ella.

¡Manes a la ciencia!

Ellaborar mensaxes secretos con cera y acuareles ye bien cenciello. A cencielles escribiremos o dibuxaremos cola cera blanca’l nuesu mensaxe, que va quedar invisible. Quiciabes cuéstenos un poco ver lo que tamos dibuxando, pero si vamos despacín y fixándonos, resultarános bien fácil.

Depués, pa poder desvelalo, moyaremos el nuesu pincel con acuarela y pintaremos percima.

Podemos emplegar distintos colores pa pintar el papel, los que más nos presten, faciendo que quede más guapo.

Y como per arte de ciencia... ¡el mensaxe apaecerá!

Pa siguir esperimentando

Emplegamos esta téunica pa facer mensaxes secretos pero… ¿y si facemos dalguna otra creación? Tantu’l procesu como’l resultáu son perguapos, asina que vos animamos a dexar volar la vuesa imaxinación y crear les vuestres propies obres artístiques.

Per otro llau, esisten formes un poco diferentes de facer mensaxes secretos, ensin recurrir a la tinta invisible ¿cómo? Encriptando’l mensaxe. Por exemplu, pues dar un valor numbéricu o un símbolu a cada lletra (A ye 1, B ye 2, C ye 3, etc.). D’esta forma podemos crear pallabres con los númberos ¿Qué significa entós 8 16 12 1? O más difícil tovía ¿1+2  6+3 6-1 7+7 4-1 12-3 1+0?

¿Y si entemecemos dambes idees? ¿Y si creamos obres artístiques con mensaxes encriptaos?

Pa saber más

Cuando pintamos cola cera sobro’l papel, tamos faciendo qu’esos trazos vuélvanse impermeables; l’acuarela nun pue trescalar la cera nin la parte del papel cubierta per la cera. Eso asocede porque l’agua y la cera nun son miscibles, ye dicir, nun podemos entemecelos o diluilos. Asocede lo mesmo que con l’agua y l’aceite, por más que ximilguemos enxamás lleguen a entemecese del too. Pero ¿por qué asocede esto?

Pa poder entemecer homogénemanete dos llíquidos dambos tienen que ser polares o apolares. L’agua ye un llíquidu polar, por ello, solo pue entemecese con otros que presenten esta mesma condición, como por exemplu, l’alcohol. Sicasí la cera o l’aceite son apolares, polo que nun se diluirán n’agua.

En la nuesa casa tenemos tamién otros llíquidos apolares, aquellos que nun podemos diluilos n’agua ¿asocedete dalgún?

¿Qué faen los científicos y les científiques?

La ciencia que se encarga de cifrar mensaxes pa que nun puedan ser desvelaos por quien no queramos ye la criptografía. La eteganografía ye la so prima hermana, se les inxenia pa escondelos con, por exemplu, tinta invisible.

Pa ello, valense d’otres ciencies, como la química nel nuesu casu, o de les matemátiques, la teunoloxía… ¡ya inclusive l’arte!

Por exemplu, na Antigua Grecia, un prisioneru nomáu Helisteo de Mileto quiso unviar al  padre un mensaxe ensin que se’enterasen los Perses, que yeran los sos carceleros ¿Cómo lo fizo? Tatuando’l mensaxe na cabeza rapada d’una persona. Esperó a que-y creciese’l pelo y unvió a esa persona col so padre, que namás tuvo que tosquilo-y nuevamente.

De toes formes, anguaño emplegamos más les matemátiques y la teunoloxía. Los nuesos móviles y ordenadores tan enllenos de criptografía, base de la programación qu’empleguen.

¿Queréis cuntanos daqué?

Prestaríanos poder acompañar les vueses esperiencies, anque sía dende la distancia. Por eso, estableceremos una vía de diálogu de forma virtual ¿Cómo lo fadremos?

• Podéis unvianos les vueses duldes, suxerencies, esperiencies, etc. colos y les peques al corréu electrónicu, escribiendo nel asuntu del email “Unipeques en casa”.
• Podéis siguinos nes redes sociales de la Universidá d’Uviéu, onde diremos publicando les novedaes d’esta páxina. Amás, si compartís les vueses esperiencies nes redes sociales, podéis mencionanos y emplegar el hashtag #unipequeencasa y #universidadparapeques.
• Al traviés del nuesu canal de telegram y en Instagram podéis tar al día de les nueves publicaciones.

Artículo traducido por María Iglesias Orviz

La Universidad para peques/ Universidá pa guah.es / Children's University es un proyecto de la Universidad de Oviedo, que cuenta con la colaboración de la Fundación Española para la Ciencia y la Tecnología - Ministerio de Ciencia, Innovación y Universidades, Caja Rural de Asturias, Banco Santander, Grupo Hunosa, Ayuntamiento de Siero, APADAC, Pridental, Cluster TIC Asturias, DXC Technology, Lacera e ITVasa.