Universidá para guaḥes

La Universidá pa guah.es ye un programa de cultura y ciencia empobináu a neños y neñes d’educación infantil y primaria, qu’inclúi ciclos de talleres STEAM (Ciencia, Tecnoloxía, Inxeniería, Arte, Matemátiques), organización d’eventos científico-lúdicos y actividaes culturales estremaes.  El programa va desendolcase de forma estable nel cursu académicu n’espacios universitarios distintos, ta coordináu por personal científicu de la Universidá y ye de baldre.

L’oxetivu principal de la Universidá pa guahe.s ye ayudar a despertar l’interés innatu de los neños y neñes pola ciencia y a conocer les profesiones científiques. Movemos un aprendizaxe basáu na esperimentación y resolución de problemes, favoreciendo’l desarrollu de la cultura científica y despertando vocaciones tempranes, al tiempu que meyoren les competencies de les y los peques que, a la vez, van orientando los sos gustos y habilidaes.

Taller Camisetas con Ciencia

 ¿Por qué?

El desarrollu de competencies científiques y tecnolóxiques dende edaes tempranes ye fundamental pal desarrollu de la nuestra sociedá, yá que:

  • Favorez el desarrollu personal y la toma de decisiones;

  • Ye un conocimiento necesariu pa la participación en debates sociales y procesos democráticos;

  • Contribúi al arriquecimientu personal de la ciudadanía;

  • Ye un puntu clave nel crecimientu económicu y social d’un colectivu.

Sin embargu, la enseñanza de la ciencia y la tecnoloxía nun suel incluyir nel día a día de los neños y neñes y hai pocos programes que se pongan en práctica de siguío y de forma estable. La ciencia y la tecnoloxía sigue sintiéndose como dalgo difícil y alloñao de la cotidianidá de la infancia y de les sos espectatives y concíbese mayoritariamente dientro del territoriu de les persones adultes que fueron formaes específicamente pa ello.

La Universidá pa guah.es intenta tresformar esta visión de la ciencia y conectala col mundu infantil al traviés del xuegu y la experimentación, sofitando’l carácter investigador natural de la infancia; amosando a los neños y neñes el so futuru rellacionáu cola ciencia como dalgo accesible, vital y profesionalmente.

¿Qué facemos?

Nos talleres de la Universidá pa guah.es siguimos una metodoloxía propia que fomenta’l descubrimientu científicu dende lo cotidiano y la experimentación autónoma pa crear conocimientu y desendolcar habilidaes científiques. Queremos que los neños y neñes faigan les sos propies preguntes y formulen les sos hipótesis, fomentamos l’autoconfianza y el desarrollu del so pensamientu lóxicu.


Los nuestros talleres faense polo regular en tres etapes:

  1. Descubrimos. Empezamos con una llectura compartida y un debate pequeñu, pa despertar l’interés de los neños y neñes por un tema determináu y ayudalos a que faigan les sos propies entrugues.
  2. Esploramos. Darréu, propónse-yos una actividá na que puen apalpar, sentir y explorar de manera más concreta dalgunes de les custiones que presentemos na etapa de primero.
  3. Esperimentamos / Creamos. Cada taller termina bien con una actividá d’esperimentación, bien con una actividá creativa, qu’en xeneral entemez ciencia y arte, y pieslla’l círculu de descubrimientu, aprendizaxe y esfrute qu’empecemos cola llectura.

¿Cómo lo facemos?

Les actividaes de la Universidá pa guah.es faense siguiendo un modelu constructivista del aprendizaxe, que considera que’l conocimientu nun se tresmite simplemente del profesoráu al alumnáu, sinón que los neños y neñes constrúin activamente’l so propiu conocimientu. Con esta base, plantegamos provocaciones atractives y propuestes abiertes d’actividaes, que llogren que los neños y neñes se metan d’una manera mui natural y activa nel desarrollu de los talleres.

Trabayamos con ellos y elles faciendo propuestes abiertes que-yos permitan trabayar y pensar coles manes (Tinkering), centrase nel procesu más que nel resultáu, y aprender faciendo y xugando (Learning by doing). El nuestru llabor como guíes de los talleres ye acompañar nesi procesu d’aprendizaxe de los neños y neñes, animalos a facer entrugues, y desarrollar hipótesis y plantegar experimentos, respetando siempre’l momentu y ritmu d’aprendizaxe de cada persona.

 

Eventos

 

Enllaces rápidos